三年冇嚟香港宣傳唱片嘅周杰倫（Jay），噚日喺觀塘apm為新碟《12新作》做簽唱會，吸引逾千人逼爆商場圍觀，大會派咗三千個簽名籌，fans玩遊戲時炮製愛心湯圓畀偶像，唱片公司高層仲頒獎畀Jay，賀佢嘅專輯喺香港銷量超越8萬張、數碼串流超越500萬次。
今次Jay帶媽咪嚟香港，問點解元宵都唔陪女友？雖然Jay多次俾人影到同昆凌拍拖，但佢依然擘大眼講大話：「陪媽咪不會給人說，而且我沒有女朋友，只是有很多女性朋友，陪隨便一個都不好。」至於老友余文樂同吳雨霏傳緋聞，Jay話唔知道，不過佢有留意契爺黃秋生同羅志祥嘅是非，仲話唔敢問契爺。
女歌迷以Jay新歌《公公偏頭痛》MV嘅公公look造型撐場，認真有心思。
Jolin見家長
現場有男fans舉牌：「雙J胸都好大，都很SEXY」似乎係話Jay同過氣女友蔡依林（Jolin），佢笑話：「不能比較，男生一定輸。」而Jolin早前跟男友錦榮返家鄉新西蘭度假兼見家長，錦榮前日喺台灣出席活動，大方承認：「他們（父母）對Jolin印象很好。」問幾時娶已達適婚年齡嘅Jolin為妻？佢話：「沒有想過，Jolin年紀沒有很大。」
Jay唔認有女友，反而元宵佳節嚟香港宣傳新碟。有男歌迷特別炮製「雙J胸都好大，都很SEXY」紙牌。
from:
http://hk.apple.nextmedia.com/entertainment/art/20130225/18175706
