為咗搵錢，蔡少芬同老公張晉經常分隔異地，早排兩公婆分道揚鑣，老公帶住個女由上海返香港，蔡少芬就佗住六個月肚，自己飛去成都做剪綵，做完即刻撲返香港，爭取時間共聚天倫。
上個禮拜，一家「四」口去咗銅鑼灣high tea，蔡少芬一次過order兩種唔同味道嘅蛋糕俾囡囡「湯丸」食。兩歲人仔都未夠，湯丸唔只生得可愛，仲識照顧爸爸媽媽，自己攞住支叉，㓤住嚿蛋糕餵爸爸食，餵完爸爸，諗住轉身餵埋媽咪，大肚蔡少芬say no，最後益埋張晉，可以食多啖。
啲人成日話囡囡係爸爸前世嘅情人，雖然張生張太都係基督徒，唔信前世今生，但八珍記得蔡少芬佗住湯丸嗰陣，去到邊都有張晉拖到實，家陣再大肚，去停車場攞車嗰陣，張晉只係掛住同囡囡騎膊馬，張太地位，早就俾湯丸佔晒！
蔡少芬佗B唔想食甜，益晒老公張晉，有湯丸餵食甜入心蛋糕。
湯丸有幾聲咳咳，蔡少芬緊張到即係同囡囡掃背脊。
張晉拖完囡囡再玩騎膊馬，湯丸開心笑晒，大肚蔡少芬自己照顧自己。湯丸唔肯落地，張晉好小心，曲住腳行入𨋢，保證囡囡唔會中頭獎。
