前港姐陳倩揚嫁人生仔之後，要兼顧家庭同事業，前幾日佢趁過年爭取時間享家庭樂，一家三口去將軍澳東港城濕平，老公陳浩然負責推住BB車，囝囝陳羲廷（Auryn）已經識得落地行，佢哋入咗一間做緊四折嘅童裝店幫囝囝買衫，認真知慳識儉。
只有19個月大嘅羲廷全程黐實媽咪，又扭又嗲要媽咪抱抱，搞到倩揚一手抱仔一手揀衫，真係有啲狼狽，倩揚發揮媽咪精神，贒到一件童裝格仔衫，同老公身上嘅格仔衫襯到絕，倩揚飛撲幫乖仔換埋父子裝，但羲廷忽然扁嘴扭計，倩揚即刻坐低𠱁仔，仲同老公相視而笑，十分溫馨。
老公爭住湊仔
佢哋喺店內逗留咗半粒鐘，買咗唔少戰利品，事後倩揚接受訪問話：「過年買啲新年氣氛衫，影相會靚啲，做咗媽咪後好少買嘢畀自己，去行街都係睇童裝。」倩揚仲爆老公呷醋：「囝囝見到我就爸爸都唔要，私下我好開心，但爸爸就好呷醋，仲同我講覺得自己得負分，所以老公一放假會爭住湊仔，希望喺個仔心中爭取多啲分。」
老公陳浩然負責推BB車，陳倩揚就睇實會行會走嘅囝囝。
from:
http://hk.apple.nextmedia.com/entertainment/art/20130212/18162966
