周星馳近排新聞多多，媽咪姐最近都八到單料，甄子丹原來同星爺有牙齒印。
話說多年前甄子丹未紅，初初做導演嘅佢，膽粗粗搵星爺拍新戲。難得星爺應承，仲叫丹爺去搵佢傾。翌日，丹爺準時出現，星爺都喺度，不過身邊就多咗幾個朋友。星爺話：「你等我一陣，好快傾完！」
丹爺惟有坐喺隔籬枱等啦，一等就兩粒鐘，見星爺未有意欲傾，佢最後好客氣咁告辭。點知星爺竟然話：「乜你仲喺度咩？我都有新戲開，一定預埋你！」當然，星爺之後嘅戲未見丹爺出現，而丹爺亦冇再搵星爺啦。
開講有話：敵人嘅敵人就係朋友，宇宙最強推薦同星爺不和嘅黃聖依做新戲《冰封俠》女主角，會唔會有關呢？
身兼演員及武指嘅丹爺，着住套古裝指示工作人員，一路講一路有人幫佢執番靚啲頭髮。丹爺拍一套戲要成二千萬片酬，秒秒鐘都值錢，梗要把握時間啦。
趁未埋位，黃聖依（左）密密食日式章魚丸，仲同石詠莉傾到鬼咁開心。
蕭若元不時有大膽言論，有傳遭內地封殺，唔俾佢個仔蕭定一有份投資嘅《冰封俠》入大陸市場。蕭公子聲稱費事累人，決定撤資，不過上星期仲見到佢探班。
宇宙最強？邊位呀？（設計對白）
