喺啱啱過咗去嘅「小年」(即臘月廿三謝灶)同「立春」，鄭中基同前妻阿Sa蔡卓妍分別喺微博提早曬賀年相，前者同大家拜個早年，後者就喺屋企玩煮飯仔煎蘿蔔糕，好有過年氣氛。阿Sa廚藝如何，相信要問嚇陳偉霆先知喇！班藝人已經準備迎接蛇年，媽咪姐都要準備嚇先！
鄭中基拜早年
鄭中基同余思敏生嘅囡囡已經歲幾啦，政府話養一個細路要四百萬，所以呢年鄭中基不停𢱑銀撲奶粉錢。早前新戲上映仲走去深圳做宣傳，但佢不忘喺微博同fans拜個早年。咁又係嘅，唔勤力啲keep住人氣又點搵更多人仔呀！
蔡卓妍煎糕應節
做過人妻果然唔同啲，對曆法有多少認識嘅阿Sa蔡卓妍，喺「小年」2月3日入廚煎蘿蔔糕，原因係嗰日要謝灶。阿Sa為應節煎咗底蘿蔔糕，煎俾邊個食？唔使估，都係陳生㗎啦！
黃智賢祝福你
近期一劇接一劇曝光率非常高嘅黃智賢，原來喺國內都勁多人識。蛇年將至，佢就提早祝大家同佢一樣「撈乜都掂」！
陳敏之撈起
長腿姐姐陳敏之憑住劇集《法網狙擊》人氣升到嘭嘭聲，嚟緊仲轉型同郭晉安一齊主持飲食節目。趁住立春，佢同馬國明、吳卓羲同蕭正楠一齊去食「撈起」，寓意蛇年撈得風生水起。真係好意頭！
李珊珊利是ready
新年派利是係傳統習俗，未結婚嘅可以豁免，但李珊珊入行無耐就已經學人派利是！今年佢一到立春，就搵埋鐘點姨姨幫手入錢，睇怕五位數都走唔甩。
黃偉文古怪立春look
一向著衫都潮過人嘅黃偉文，每次出現都勢必要嚇人一跳，今次佢呢個人肉圖騰look，雖然睇到人眼花花，不過都算係佢最有創意嘅賀年立春look。
