【銅鑼灣】七月左右就做人老竇嘅陳小春，早幾日喺內地嘅節目爆咗呢個消息。前日下晝4點幾小春一身hip hop打扮，揸住部Hummer越野車去咗銅鑼灣，當佢泊低架車喺新寧道街邊嘅時候，忽然謝霆鋒嘅助手表哥行咗出嚟，見佢口噏噏而小春笑晒口，唔使問梗緊係讚佢叻仔之餘又恭喜佢就快做老竇啦。之後兩個男人企喺車旁邊吹水，煲咗一陣煙，有個男仔行嚟同小春會合，跟手就過咗去白沙道一間Nike店睇衫。
入到間店兩人分頭行事，一個睇鞋一個睇衫，可能小春都係唔放心架車擺街驚抄牌，睇咗15分鐘左右佢同個朋友已經行返去開車離開，直駛入咗柴灣一幢工業大廈。
【今日我至凸】小春個老婆應采兒有咗三個幾月身孕，應該都係未見肚，不過老公個肚同佢都睇齊，分分鐘仲凸過佢老婆
霆鋒助手表哥見到小春即時上前恭喜佢就嚟做老竇
小春同朋友行街睇衫，不過最後都係空手而回
愛嘆四川菜
兩個幾鐘之後小春單拖離開，駛到屋企附近嘅大埔墟又泊低架車，落車入咗間四川菜餐廳一陣，之後又上返車，睇嚟係買外賣同老婆應采兒撐枱腳兼慰妻。大概十分鐘之後餐廳嘅店員攞咗兩袋外賣，足足有成六盒食物放上車，呢個大肚婆都好擦得吓。
From:
http://hk.apple.nextmedia.com/entertainment/art/20130202/18153694
