生日大過天，媽咪姐就算平時唔多打扮，生日正日都會執靚啲啦。搜搜微博，原來有唔少藝人都係一月壽星，呢幾日生日party停不了。好似49歲呂方，就約埋宗師朝偉、靚佬杜德偉飲到啤啤夫；至於啱啱過33歲生日嘅祖藍，就同老死陳國邦夫婦慶祝，加埋高妹女友李亞男個自家製愛心蛋糕，真係甜到入心！
不過生日未必個個都快樂，早排俾人篤爆同泡菜男拍拖嘅阿嬌鍾欣桐，生日禮物竟然收張平平無奇嘅地氈。男友口味另類成咁，又難怪阿嬌鍾欣桐埋怨對方冇驚喜囉！
32歲阿嬌鍾欣桐第一年同韓籍新男友過生日，收嘅竟然只係一張印咗佢英文名字頭嘅地氈，阿嬌鍾欣桐字裏行間對呢份禮物唔多滿意，就連佢微博fans都鬧爆K先生冇誠意！
網友呵番
男友唔識做，阿嬌鍾欣桐生日惟有孖實容祖兒同阿Sa慶祝，有男友等於冇男友，難怪阿嬌鍾欣桐詐型嘅！
朝偉死撐
壽星仔呂方，call齊好兄弟慶祝。之前個個仲鬼打咁好精神，不過幾杯到肚，呂方、葉童老公陳國熹打斜瞓，只有朝偉仲頂得住撐大對電眼，學過功夫果然唔同啲。
煎pang求其
上個禮拜啱啱踏入35歲嘅陳展鵬，生日都要喺工作中度過。雖然生日要拮魚蛋、燒賣，不過有人妻田蕊妮同佢吹蠟燭，好過冇啦！
高Ling食自己
自從同旅行社太子爺分手後，一直自稱單身嘅高Ling，27歲生日都係一個人孤伶伶過，唔知佢生日願望係咪想快啲搵到個好碼頭呢！
祖藍有口福
祖藍套《老表，你好嘢！》大收，撞啱前幾日係佢生日，不過佢只同老死陳國邦夫婦食吓家常便飯就算。好在有長腿女友李亞男個handmade蛋糕補數，加埋老闆楊受成送嘅花，冧爆！
