近呢幾年,每逢農曆新年電影檔期,都係睇曾志偉同黃百鳴對撼,由開畫當日鬥到落畫,幾乎每次喺香港都係曾志偉贏個馬鼻,百鳴哥就喺內地市場稱霸,閒閒哋收過億人仔。
講無厘頭同明星大雜燴,曾志偉同黃百鳴都叮噹馬頭,冇所謂啦!賀歲片都係冇新意得啖笑,不過今年殺出套《西遊.降魔篇》呢個程咬金,話晒都係星爺嘔心瀝血之作,大家一定期待。究竟睇欣宜吮謝天華腳趾定吳君如鄭中基搞爛gag,抑或降魔女舒淇溝孫悟空,真係好難揀!
《2013我愛HK恭囍發財》
![蛇年賀歲片大鬥法,曾志偉食硬黄百鳴圖片1](http://hk.sudden.nextmedia.com/images/next-photos/SuddenWeekly/913/640pixfolder/A913_018_13100484.jpg)
![蛇年賀歲片大鬥法,曾志偉食硬黄百鳴圖片2](http://hk.sudden.nextmedia.com//images/next-photos/SuddenWeekly/913/640pixfolder/A913_018_02.jpg)
導演:鍾澍佳
演員:曾志偉、葉玉卿、譚詠麟、謝天華、黃宗澤、徐子珊、鄭欣宜、馮淬帆
上映日期:13年2月7日
劇情:講70年代,忠直嘅黃宗澤同狡猾嘅謝天華,一齊喺茶樓打工兼追女。轉眼去到2013年面對現代金融危機,就齊齊搵神仙曾志偉打救。
忽評:《我愛HK》系列拍咗4年,今次有真正嘅「福、祿、壽」助陣,葉玉卿仲專程返嚟拍咗十日八日戲,欣宜增磅扮肥姐,志偉升呢做神仙幫人,不過內容都係炒雜碎。早前曾志偉因為涉襲擊同恐嚇,家陣要保釋候查,戲中講到佢咁勁,唔知佢有冇計打救埋自己呢?
![蛇年賀歲片大鬥法,曾志偉食硬黄百鳴圖片3](http://hk.sudden.nextmedia.com/images/next-photos/SuddenWeekly/913/640pixfolder/A913_018_2013poster.jpg)
![蛇年賀歲片大鬥法,曾志偉食硬黄百鳴圖片5](http://hk.sudden.nextmedia.com/images/next-photos/SuddenWeekly/913/640pixfolder/A913_018_08B.jpg)
![蛇年賀歲片大鬥法,曾志偉食硬黄百鳴圖片7](http://hk.sudden.nextmedia.com/images/next-photos/SuddenWeekly/913/640pixfolder/A913_018_01.jpg)
《百星酒店》
行貨之選
導演:谷德昭
演員:鄭中基、杜汶澤、吳君如、毛舜筠、熊黛林、薛凱琪、黃百鳴、吳千語
上映日期:13年2月7日
劇情:五星級豪華酒店聘用四星級員工,身為明星嘅吳千語戀上副經理鄭中基;薛凱琪演富二代則為承繼巨額遺產企圖辦一場假結婚。
忽評:論卡士佢唔算弱,加上近排吳千語藉住同林峯半同居緋聞而人氣上升,大收宣傳之效。如果套戲中基換成chok峯仲會好啲㖭!
![蛇年賀歲片大鬥法,曾志偉食硬黄百鳴圖片9](http://hk.sudden.nextmedia.com/images/next-photos/SuddenWeekly/913/640pixfolder/A913_018_11.jpg)
![蛇年賀歲片大鬥法,曾志偉食硬黄百鳴圖片11](http://hk.sudden.nextmedia.com/images/next-photos/SuddenWeekly/913/640pixfolder/A913_018_06.jpg)
《西遊•降魔篇》
導演:周星馳、郭子健
演員:舒淇、黃渤、文章、羅志祥、周秀娜
上映日期:13年2月7日
劇情:算係《大話西遊》嘅前傳,講嘅係文章演嘅唐三藏,同演孫悟空嘅黃渤,年青時代相遇相識,馬騮仔同舒淇仲有感情線。
忽評:相隔4年星爺再有電影上映,佢先聲奪人話:「成為第一個在特效上可以超過好萊塢的國產電影。」星爺雖然冇份出鏡,但自知今次唔衰得,戲未上已冧舒淇博宣傳,又讚到男主角黃渤天上有地下無,唔知呢位新任齊天大聖能唔能夠超越當年星爺呢?
![蛇年賀歲片大鬥法,曾志偉食硬黄百鳴圖片13](http://hk.sudden.nextmedia.com/images/next-photos/SuddenWeekly/913/640pixfolder/A913_018_DSC_0008.jpg)
![蛇年賀歲片大鬥法,曾志偉食硬黄百鳴圖片15](http://hk.sudden.nextmedia.com/images/next-photos/SuddenWeekly/913/640pixfolder/A913_018_xk8CcEdn.jpg)
《Together在一起》
導演:霍耀良
演員:甄子丹、陳妍希、柯震東、Angelababy、黃宗澤、周秀娜
上映日期:13年2月21日
劇情:演差佬嘅甄子丹為救陳妍希,撞親個頭患上表情缺失症。Angelababy係個名牌奴隸,以為柯震東監視佢即時反面唔認人。
忽評:宇宙最強甄子丹拍愛情片真係諗都冇諗過,仲要拍住妍希BB,年紀差一截,點睇都唔順眼。柯震東同Angelababy呢pair都係靚人靚衫,咁嘅人物配搭同劇情,應該同《那些年》冇得fight囉!不如香港都拍番套CY同蔣麗芸《在一起》,可能仲收得。
![蛇年賀歲片大鬥法,曾志偉食硬黄百鳴圖片18](http://hk.sudden.nextmedia.com/images/next-photos/SuddenWeekly/913/640pixfolder/A913_018_Together_3751.jpg)
大星撐西片
《喪星玩轉荷里活》
導演:彼得費華利、畢維納
演員:曉治積曼、琦溫絲莉、李察基爾、娜奧美禾絲、荷爾芭莉、謝拉畢拿、愛瑪史東、嘉兒莫蕊茲、奧瑪花曼、祖舒杜咸米爾
上映日期:13年2月21日
劇情:超重口味喜劇,搵嚟勁多巨星,當中肥溫琦溫絲莉同「狼人」曉治積曼放下身段大放笑彈。
忽評:大明星多到痹,不過預咗斬到碎濕濕囉,要睇明星定要劇情,觀眾諗過先!
![蛇年賀歲片大鬥法,曾志偉食硬黄百鳴圖片21](http://hk.sudden.nextmedia.com/images/next-photos/SuddenWeekly/913/640pixfolder/A913_018_MOVIE4_1.jpg)
![蛇年賀歲片大鬥法,曾志偉食硬黄百鳴圖片23](http://hk.sudden.nextmedia.com/images/next-photos/SuddenWeekly/913/640pixfolder/A913_018_c.jpg)
《林肯》
史實真相
導演:史提芬史匹堡
演員:丹尼爾戴路易斯、湯美李鍾斯、祖瑟夫哥頓利域、莎莉菲、大衞史卓恩
上映日期:13年2月14日
劇情:重塑美國第十六任總統阿伯拉罕.林肯遇刺前四個月,為國家勞心勞力,埋下被暗殺嘅伏線。
忽評:林肯做總統做到俾人搬上大銀幕,仲有讚無彈。睇番香港豆膶咁細最大嗰位叫「特首」梁振英,上任以來受千夫所指,香港真可悲。
《虎膽龍威:擇日開戰》
父子上陣
導演:尊摩亞
演員:布斯韋利士、柴葛尼
上映日期:13年2月7日
劇情:布斯韋利士飾演「經典爽辣英雄」尊麥堅,同佢個廿歲親生仔「小尊麥堅」父子情麻麻,一次個衰仔因闖大禍差啲引發大戰。
忽評:《虎膽龍威》系列都第5集啦,點睇都唔覺悶,今次仲有《通天奇兵》大編劇撐場,火爆鏡頭又點會少。鍾意睇緊張刺激過癮情節嘅你,今個農曆年識揀啦!
卡通啱細路
《喜羊羊過蛇年》
拯救世界
配音:徐子珊、麥長青、Purple李紫昕姐姐
上映日期:13年2月9日
劇情:天災降臨,大家要逃離即將毀滅的草原大地,辦法只有啟動地下神舟,但只有失蹤已久的「蛇族」才能啟動,於是喜羊羊同灰狼組成戰隊出發尋找「蛇族」,路途面對重重困難,例牌迎刃而解。
忽評:《喜羊羊》因為呢類1級卡通片劇情簡單,又有教育意義,講到明要通力合作才能成事。正如梁振英做特首一樣,同「阿爺」通力合作睇實香港,不過和諧唔和諧,就難講啲啦!
《海賊王劇場版Z》
鬥智鬥力
上映日期:13年2月14日
劇情:在其中一個島嶼暗藏一種巨大能量礦物,引來前海軍大將Z及一群自稱是NEO海軍前來偷取。當Z成功奪取時,竟要消滅全部海盜。
忽評:《海賊王》劇情不外乎幾幫人打打殺殺,目的都係要征服成個海洋,做真正嘅海賊王。情況咪同香港地產商一樣,征服晒成個香港,每個市民都要捱貴租供貴樓。
《鬼靈精怪大酒店》
殭屍招婿
配音:Adam Sandler,Selena Gomez
上映日期:13年2月7日
劇情:吸血鬼德格拉(Adam Sandler聲演)經營只招呼鬼怪的五星級酒店,自老婆過世後,為了避免女兒Mavis(Selena Gomez聲演)與人類男孩相愛,趁女兒18歲,廣邀妖怪開P慶祝,希望女兒揀個怪物男朋友。
忽評:合家歡3D動畫,吸血鬼爸爸與女兒之間的父女情最touching,劇情似足趙世曾五億招女婿,反對阿女趙式芝與同性密友結婚,不過女生外向,阿爸最後都要屈服。