唔止𡃁模晒胸博上位，就算係影壇阿姐，只要對自己副「波地」有信心，一樣可以日日賣奶。好似孫藝珍咁，近年拍住韓國一哥裴勇俊及車太鉉演愛情片，套套搏到盡，晒胸兼任君抽水。已經三張嘢嘅孫藝珍，近年開始轉型，10年拍住靚仔李民浩喺《個人取向》做烏wet剩女。近日喺韓國災難片《火海108》「騷胸」轉「騷凶」，不但要被人淋水變落湯雞，仲要俾火燻到周身黑，認真凶險！
韓國媒體講到孫藝珍時，往往會拉埋「緋聞強迫症」一齊講。何謂「緋聞強迫症」？即係話孫藝珍的緋聞男友，統統都是她在電影電視的男拍檔，「最佳男主角」包括車太鉉、宋承憲同李民浩等等，而次次都被證實是煲水新聞。
緋聞強迫症的後遺症，是令到好男人都被嚇怕，孫藝珍自然冇仔埋身。好在，孫藝珍是韓國演藝界的小富婆，每個廣告酬勞6億韓圜（約440萬港元），去年她就一擲22億韓圜（約1,600萬港元）在首爾買樓，正一皇帝女唔憂嫁。
在《火海108》飾演大廈經理，今次唔使賣性惑，仲做咗「代母」，幫暗戀自己嘅男同事湊女。孫藝珍全套戲唔係走難就係救災，經常污糟邋遢，一改以往靚女形象。
除咗被火燻到一身黑，孫藝珍仲要被水浸，同時又要救人。嘩，成個女版布斯韋利士咁！在韓劇《個人取向》中，孫藝珍飾演的剩女誤以為李民浩是「基佬」，由「好姊妹」發展成情人。
5噸水照頭淋
孫藝珍搵錢，有血有汗，早年犧牲色相，袒胸露肉拍電影，今次拍《火海108》唔sell胸，仲辛苦。《火海108》講摩天大廈火燭，導演唔用電腦特技用真火，話更有質感，搞到片場濃煙滾滾，偏偏演員又唔可以戴防毒面具，一班演員苦不堪言。飾演大廈經理的孫藝珍說：「有幕戲講我被困升降機，我當時焗到心口發悶，呼吸困難，辛苦到以為自己真係會死！」
除了俾火燒，由於高溫大火令大樓結構變得脆弱，孫藝珍需要排走水箱的儲水，以減輕大樓負重。劇組動用了6台大型抽水機、4台吊車、合共100名工作人員，花了6天時間拍攝。說得具體些，即是每次導演嗌action，都有高達5噸的水撲向孫藝珍！
孫藝珍話：「最慘拍嗰時天氣凍，每次淋水落嚟，凍到要兩、三秒至反應到，真係攰死人。所以拍攝期間一日三餐都要食得好飽，加上每日收工都會同工作人員happy hour，煞科後我發現自己肥咗！」現時孫藝珍已經成功瘦番十磅，方法是唔食白米，正餐以外唔食零食，口痕就食無糖薄荷片。同樣愛蒲的港女們，都可以試試。
露西半球
孫藝珍個老公，在《外出》同裴勇俊個老婆偷情時撞車昏迷，綠帽夫與綠帽妻因同病相憐而撻着。
色誘車太鉉
喺《瘋狂初戀》，啱啱上水嘅孫藝珍特登向車太鉉挺胸收腹，搞到車太鉉噴晒鼻血。
晒pat pat
在懸疑片《白夜行》，孫藝珍有不少裸露鏡頭，雖然冇露點，但誘惑在若隱若現，而且玉背、玉臀任睇。
首周200萬人捧場
本周抵港的《火海108》，集合了孫藝珍、薛景求、金相慶及安聖基四位影后影帝演出，在韓國上映一周就吸引了200萬人捧場，捧場人數比去年全韓國最高票房的《成為王的男人》更多；而《火海108》在聖誕日單日有43萬觀眾入場，名列韓國史上第二。
《火海108》講述樓高108層的豪華大廈，直升機不斷噴灑人造雪花，營造一個人工白色聖誕。不料直升機失控直接撞入大樓，在離地1,312呎的半空，三萬人被困在千度高溫的火海之中！
《海雲臺》男主角薛景求，今次飾演休班消防隊長，照舊又係為救火而對情人爽約，明炒《虎膽龍威》條橋。
火警現場人人搶住搭𨋢逃生。嘩，仲墟冚過強國人掃年貨。大廈另一經理金相慶同孫藝珍互有好感，金飾演單親爸爸，個女唔使講你都知，梗係同佢擺同一pose嘅妹妹啦。
