甄妮因爆出鄧紫棋（G.E.M.）沒有跟她打招呼搞到新聞一大籮，前晚她接受梁思浩訪問時先爆張栢芝當年因在機艙嘈吵被教訓，事後親到紅館向她哭着道歉，接着再插G.E.M.講大話，指在港台頒獎禮上大家本有機會見面泯恩仇，只是G.E.M.視她不見。
甄妮踢爆張栢芝當年因機艙事件，專程到紅館找她賠罪
近日是非不絕的甄妮前晚到柴灣接受now TV節目《娛樂審死官》中梁思浩的訪問。易惹是非及經常做封面人物的甄妮笑言：「有編輯話我係打不死嘅老虎，點寫我都企喺度，但如果弱啲嘅人都可能自殺。」因為爆G.E.M.無跟自己打招呼後，有報道指她又批評林峯，甄妮澄清：「我唔識佢，係個記者引導我講，我冇講過林峯，喺度我同佢say sorry。」
鬧陳奕迅玩牌嘈
甄妮曾鬧陳奕迅（Eason）、張栢芝和陳曉東在飛機嘈爆，她謂：「佢哋坐頭等，Eason坐地下玩啤牌，但太嘈搞到外國人好反感，空姐同機長都搞唔掂，我咪行埋去叫佢哋去洗手間嗰個位玩，佢哋好乖，我冇當一回事，因為我當時唔知嗰個係Eason。點知落機有記者問，原來坐我隔籬嘅薛家燕講出嚟，唔通我又話薛家燕抽水，我哋好老友。」
【今日我至寸】甄妮前晚接受訪問時踢爆G.E.M.講大話，佢話喺港台頒獎禮上根本大家有見面同講話嘅機會，仲叫佢不如對牆講我愛你，一於寸到盡。
接着甄妮爆出原來栢芝親身向她道歉：「佢好乖女，我好鍾意佢，有年佢去紅館後台，寫滿張卡片喊晒say sorry。人哋喺微博say sorry，不如對牆講我愛你。」此話擺明寸G.E.M.。若G.E.M.去後台會否接受？甄妮即說：「嗰日頒獎禮佢就應該嚟搵我。」但G.E.M.稱工作人員表示她早已離開，甄妮即說：「亂講，我坐喺嗰個地方五分鐘等住上台，我心入邊諗唔好再有負面嘢。如果你想要聽日頭條，你就過嚟搵我，只要輕輕講一句就已經OK啦。」G.E.M.當日又聲稱甄妮上台時，她卻在後台未能碰面，甄妮再否認：「我睇住佢企喺嗰度，一班人喺旁邊，我坐喺度五分鐘，一個咁好良機，咁好嘅機會畀你。我係畀你機會，我可以企喺後邊等上台，我唔想再講，係有一個非常嘅機會，件事就可以落幕，你搞咁多嘢做乜。如果對我唔滿意可以企出嚟，對住我，眼對住眼，我哋大家有得拗吖嘛。」
當面傾絕不介意
甄妮稱若G.E.M.想找她當面傾，只要她有時間絕不介意。甄妮直言因此事搞到人人怕她，連修甲和看更也是：「如果因咁對我及其他前輩尊重，犧牲我算死而無憾。」此外甄妮前日傍晚和女兒Melody及友人到銅鑼灣醫肚。
From:
http://hk.apple.nextmedia.com/entertainment/art/20130125/18145464
