Jade出道10年，難得遇到首掃獎歌，雖然《叱咤》一向唔buy佢，但估唔到港台都食白果。週日晚佢仲着到鬼火咁靚去頒獎禮，點知食白果，嘥心機。
頒獎禮前，關心妍俾網民一致睇好嘅〈失戀哲理〉，結果除咗新城嘅豬肉獎外，十拿九穩嘅無綫金曲金獎，竟然變咗王菀之嘅〈留白〉，全世界戥關心妍唔抵！
原本打算完晒頒獎禮，開多個騷先至生BB嘅Jade，上週又喺港台《十大中文金曲頒獎禮》食白果，即嬲到喺微博暗示要退出樂壇。
FBI聽聞，今年Jade真係輸得好寃枉，頒獎禮前夕，所屬公司星娛樂先後人事變動，加上星煥老闆何哲圖要出手打壓死敵黄柏高，港台頒獎禮當晚，連薛凱琪都輸畀Gin Lee，得個「全年最佳進步」銀獎、陳僖儀直頭連新人獎都冇，反而謝安琪冇新歌都打入十優，Paco嬲到成晚唔見人。FBI打畀Jade，佢就好感慨咁話︰「原來樂壇咁大，都容納唔到一個關心妍，我唔再堅持呢個遊戲，惟有衝破呢度，去做自己鍾意做嘅嘢。」Jade仲話考慮暫時退出後，生埋BB先復出。2013樂壇又少咁個唱作靚歌星喇！
《勁歌》頒獎禮前夕，網上流傳唔少得獎結果，網民一致睇好Jade橫掃。《勁歌》當晚，Jade身穿價值4萬幾嘅戰衣，可惜只入圍「十大勁歌」。
港台頒獎禮之後，Jade即時喺微博宣洩，仲同歌迷講唔好意思添！
Jade喺微博暗示退出之後，唔少圈中人留言，小師妹陳僖儀都話覺得好可惜。
今年Jade喺紅館開騷、又拎埋傑青，仲有Paco做軍師，唔明點解連港台十優都冇份，唔嬲就假。
《勁歌》當晚，Jade老公（右一）一早訂咗打邊爐慶功，冇金曲金獎都照去咗打邊爐。
