𡃁模羅彩玲（Vivian）噚日由經理人向展邦陪同喺觀塘開記者會，澄清唔係周秀娜同男友陳偉成（Avis）之間嘅小三，唔認搞散佢哋嘅6年情。Vivian唔單止唔厭煩咁解釋，仲見記者就派佢本上年出嘅寫真，一啲都冇嘥料。講番同Avis張床照，Vivan話真相唔係咁，只係大家飲醉酒瞓喺梳化，朋友影咗放上facebook，事後已經刪除晒啲相。Vivian話佢哋分手唔關佢事：「佢哋冇聯絡見面，感情好難維繫。」覺唔覺得Avis有心追求？Vivian話：「我唔識答，我哋真係冇一齊過。」點解合照流出街？Vivian解釋：「可能佢哋分手，傳媒四處搵料。」
Vivian化行妝同經理人開記者會，澄清自己唔係小三
唔答有冇性關係
大家都好關心嗰晚Vivian同Avis咁醉有冇發生性關係？Vivian扮聽唔到然後話：「我醉咗瞓咗，事後醉醒至知俾人影咗相。」咁醉點肯定冇？向展邦出口代答：「酒醉三分醒。男方應該光明正大出嚟同大家講番呢件事。」覺得有人龜縮？向展邦答：「係，唔係要將責任放喺邊，但唔好匿埋。」記者噚日再搵Avis，但佢直情熄埋電話潛水。另外，娜姐噚日接受商台電話訪問，佢再次強調同Avis分手唔涉及第三者：「我唔想拖其他人落水，呢樣嘢一直存在，但確實分手原因係因了解而分開。」
From:
http://hk.apple.nextmedia ... 130124/18144292
