關心妍（Jade）前晚在「十大中文金曲頒獎禮」坐定粒六擸獎而回，豈料為博攞獎唔生B的她卻全晚齋食白果，心淡的她隨即發表「不再堅持論」，為了輸獎唔輸勢，更把心一橫宣布「罷玩」頒獎禮，高調抗議，從此專心一意過少奶奶生活。
關心妍前晚出席港台頒獎禮前，在微博上載了自己穿上戰衣的相片，但最後卻食白果
2012年度四台頒獎禮由開始直至派發最後一張成績表，均在一片炮火聲中舉行，繼古巨基聲稱放假而缺席去年度的頒獎禮後，這片「罷玩潮」竟陸續蔓延樂壇。入行踏入第11年的關心妍（Jade）去年舉辦紅館個唱及連推兩張大碟，其金曲《失戀哲理》亦反應不俗，加上又獲頒「傑青」，令她在不少賽前預測中被睇高一線。信心十足的Jade亦坦言有望在前晚的「十大中文金曲頒獎禮」上分一杯羹，並身穿火紅短裙性感出席，以一副「攞獎格」等待時機擸獎。
「不能再堅持」
可惜事與願違，雖大會已大派豬肉，將「優秀流行歌手大獎」及「十大金曲獎」增設為十二個，但Jade卻未能瓜分一席，全晚慘坐冷板櫈。不是味兒的她趁頒獎禮未完時，已急在微博撰文「不再堅持論」：「再努力最終都失望……我也不能再堅持了，只希望今後好好過我楊太的生活！」字裏行間已感到得一陣怨氣。
不少歌手前晚都有獎攞，正是有人歡笑有人愁
前晚在港台頒獎禮坐了一大輪但沒獎攞的關心妍顯得悶悶不樂
事隔一晚，Jade昨日接受本報電話訪問時，更先斬後奏正式公告「罷玩宣言」：「我決定明年開始，唔再出席任何頒獎禮，但絕對唔係退出樂壇，雖然未同唱片公司講，但相信公司會支持我，我真係覺得好攰！」Jade亦是繼譚詠麟及黎明後，成為香港第三位宣布拒絕攞獎的歌手。
關心妍在早前的勁歌及新城頒獎禮都有獲獎
Jade指本來已有淡出頒獎禮之意，食白果後令她矢志不移，雖否認針對「十大」，但她怒轟大會不公：「上次攞『優秀流行歌手大獎』已經係○三年嘅事，等到今年希望變失望，我絕對唔係輸打贏要，但唔明呢個遊戲點玩，我知道好多粉絲都戥我唔抵。前晚仲係老爺生日，我都冇去，特登去支持樂壇，結果一個、半個獎都冇。公唔公平？大家有眼睇！」
港台冇收投訴
恨獎又恨B的心妍直言：「歌手有幾多個11年，為唱歌我都唔生仔住，但我唔可以再等啦，我真係好辛苦！」她「勉勵」其他歌手：「如果有其他歌手同我有一樣嘅感覺，我勸佢哋搵啱嘅地方做自己嘅音樂。」「罷玩宣言」一出，「十大」大會總監馮偉棠得知後冷笑三聲說：「我都冇辦法，好多時歌手嘅努力同成績唔係成正比。雖然好無奈，但希望佢放下釋懷，明年改變初衷，我哋道大門會為佢而開。（收過Jade粉絲投訴？）一個都冇。」
From:
http://orientaldaily.on.cc/cnt/e ...0122/00282_001.html
