佘詩曼同無綫斷絕經理人合約關係，改投與王維基有密切關係的「創藝娛樂」，眨眼兩年，點知等極王維基的「HKTV」仍未攞到牌。
眼見嚟緊三月阿佘將會完成兩年合約，無綫為求阿佘食回頭草，返娘家坐鎮做一姐，最近積極派人與她接觸，既出動曾志偉幫口，又用黃子華利誘她拍新劇，不過黃雀在後，「英皇電影」對阿佘亦虎視眈眈，中途截胡。
阿佘與無綫仍有二十集合約，完成埋就可以正式同無綫劃清界線。有三年未有幫無綫拍劇的黃子華，終於落實四月開工，一眾花旦爭做女主角。（《忽然1周》圖片）
王維基等極都未攞到牌，原本以為簽了無綫一姐，點知乜都冇拍過，阿佘就要走人。
離巢兩年
離無綫後，佘詩曼主力發展國內市場，先後拍了《建元風雲》及《嫁入豪門》兩套內地劇。據了解，阿佘離巢後轉投的「創藝娛樂」經理人公司，王維基其實是幕後老闆之一，原來的部署是等阿佘與無綫還完所有部頭合約（目前尚欠二十集），便安排她幫「HKTV」拍劇，可惜等到目前為止，牌未到手，開台日期未有着落。
雙方的經理人合約今年三月便到期，王維基借阿佘省招牌的如意算盤打唔響，收到風知阿佘約滿即走人，無綫即刻做嘢，希望她簽約回巢。
阿佘憑《天與地》入圍無綫頒獎禮最後五強，但她企硬缺席，完全唔志在。主攻大陸市場的阿佘，之前就同胡軍拍了一部大製作《建元風雲》。
原本曾勵珍想用鄭嘉穎利誘阿佘返無綫拍劇集《寒山潛龍》，點知鄭嘉穎諗都唔諗就推咗。英皇電影最近大搞經理人部門，簽了孫佳君、溫碧霞、米雪、任達華及惠英紅等人。
志偉幫口
志偉與阿佘向來都有私交，與志偉友好的殼王（陳國強）都叫他幫口，氹阿佘回巢。
「樂小姐（樂易玲）收咗order要傾阿佘返TVB，佢知阿佘同（曾）志偉有偈傾，於是搵埋志偉幫口，不過阿佘唔係好有興趣，之前搵佢出席台慶頒獎禮，俾晒暗示話《天與地》好有機會攞視后，佢都唔願返，根本唔志在。」一名無綫工作人員說。
為成功氹掂阿佘，無綫更出動四月埋位拍劇的黃子華。
「班花旦個個都吼住，想做到女主角同子華合作，公司用呢個為交換條件，講明會開《絕代商驕2》，雖然阿佘都有興趣，但無綫有附帶條件，要阿佘再簽合約。」
英皇截胡
早前鄧萃雯都開到口話想同子華合作。
與黃子華再合作，佘詩曼亦有心動，但考慮到一旦食回頭草，對發展內地市場的步伐一定有影響。
「唔係個個都好似鄭嘉穎咁，可以耍大牌推TVB劇，淨係喺內地拍劇賺錢，嘉穎而家五十萬人仔一集，抽佣都飽，相反，公司未必會長期放阿佘。」知情者說。
據了解，在內地成立經理人部門多年的「英皇電影」，亦對阿佘大拋媚眼，除了應承會安排多部大製作國內劇外，更會助她開拓電影市場，大大提高「搶佘」的成數。
福將
神級黃子華擔正的無綫劇集，收視永無甩拖，每次有劇出，都打低一眾當家小生、花旦，成為全年收視之冠。
99年《狀王宋世傑》
飾演反派賴三，與張達明大鬥法，黃子華無賴演出大受好評，劇集平均收視32點，是全年收視之冠。
00年《男親女愛》
與鄭裕玲合作100集處境喜劇，在非黃金時段創下佳績，平均收視47點，最高收視更達50點，破晒紀錄。
04年《棟篤神探》
由黃子華拍住蔡少芬，雖然多番被投訴，指劇集抹黑保險從業員，結局中黃子華要「拜拜」，觀眾又不滿喜劇變悲劇，成為最多投訴的劇集，但成功引起話題，最高收視達39點。
07年《奸人堅》
黃子華演大奸角一樣得，收視高開39點。
09年《絕代商驕》
撞啱金融海嘯，黃子華在劇中教授營商之道，如「合理化煙幕」、「等價交換」，成功掀起全城熱話，最高收視達40點。
