人多好辦事！許志安、蘇永康、張衞健同梁漢文合組Big 4之後，次次搞show次次爆。嚟緊農曆年，又喺紅館同觀眾團年，踩到大年初五過埋二月十四日情人節。
為咗呢六場演唱會，Big 4近排成日約埋去負責做音樂總監嘅雷頌德個studio開會度橋，許安同蘇康全面停接內地job，張衞健更加早喺兩個月前已經暫停接新劇。
二五同八珍講，唔計健仔拍劇幾百萬計，許安一年單係搵內地快錢，已經賺過千萬，蘇康雖然唔過千，亦好接近，開演唱會對佢哋嚟講係錦上添花，唔似得梁炳，歌酬係用嚟活血養命。
明白晒！難怪Big 4歌酬唔可以四人均分，因為除咗梁漢文，其他三個，嘢做多咗，收入少咗。
未食嘢嘅蘇康，𡁻住牛脷酥開會。Big 4演唱會由錢國偉（右一）做監製，雷頌德（左一）是演唱會音樂總監。
俾張衞健整蠱，貪靚蘇康搞到一嘴油，即時還拖。
撰文：八珍
