上個禮拜二、三（一月八及九日），過檔環球唱片後嘅Kary吳雨霏，再踩紅館開騷兩場。由當年矇眼豬膽鼻，變成今日大眼鼻直有胸有籮，Kary解釋人靚靠自信，加上佢賣聲不賣樣，整容係多餘。
好！唔講眼耳口鼻，Kary唱功同個樣一樣古怪，雖然冇甩嘴走音，只係間中唔夠氣，但佢做住體操唱《絕配》時，俾男dancer拋高fing來fing去，Kary何止零走音，更加零喘氣，咪嘴？當事人又係話冇：「話我零喘氣好開心，首歌我練咗好耐。」
冇整容冇咪嘴，成晚個騷仲有一個離奇位，就係Kary個趷得嚟唔多自然嘅巨躉，衣衫單薄，套套都係熱褲貼身衫，但巨躉只係選擇性响其中一套透視裝出現。女星愛在胸前加料炮製，Kary轉個方式，唔跟風從後進攻，明智！
Kary著上透視裝，龍躉乍現，但換咗另一條貼身皮褲，龍躉離奇消失。
做體操唱歌，Kary俾dancer fing高，又要做高難度動作，冇喘氣冇甩嘴，奇！
玩台上換衫，雖然Kary一直有著住肉色打底，但遠睇都呃得吓人。
請來昔日餅碎姊妹Miki、Stephy、區文詩做嘉賓，點解冇傅穎，Kary話佢响北京拍劇嚟唔到喎。
