【觀塘】無綫新劇《老表，你好嘢！》上周才首播，當中王祖藍飾演的內地表弟來港旅遊，惹出笑話連篇，連帶演他鄉里「細細粒」的新面孔陳嘉佳都彈出成為另類女神。細細粒並非人如其名，230磅的她噸位十足，肥胖身軀令她愛情路上滿佈荊棘，27歲的她從未踏上愛情路，更自爆是處女，不過，爆紅細細粒現在只要星途，不怕做剩女！
230磅的細細粒昨晚在觀塘大啖街邊檔，懶理途人目光
王祖藍首次既參演又兼顧創作的無綫新劇《老表，你好嘢！》，上周播出四集，最高收視達33點，約有212萬觀眾捧場，該劇破格選用亞視前花旦萬綺雯、細細粒陳嘉佳、林盛斌、鬼妹陳明恩、王菀之、張繼聰和黃光亮七個無綫新丁，加上郭晉安、湯盈盈和祖藍等抵死演出，內容寸爆中港矛盾，引來坊間迴響。
七新丁中的細細粒入行前在觀塘一間道具公司做文員，獲伯樂祖藍賞識，在《老表》扮演祖藍鄉里細細粒，身形肥胖但可愛爆燈，網友即封她為另類宅男女神，而無綫去年也與她簽下兩年賣身契。現年27歲、體重達230磅的細細粒昨日坦言自己並非暴肥，重量是隨年齡遞增，她更自爆從未拍過拖，現在仍然是處女。
細細粒昨晚在觀塘放工抵不住肚餓，到附近街檔篤魚蛋
醫完肚後，細細粒即駕駛老闆借給她的車子回家
「𠵱家230磅啦」
細細粒在上海出生，是家中獨女，兩歲時隨父母來港定居，她坦承讀書成績不太好，母親擔心她不成大器，在她11歲時強迫學琴。提到肥胖身形，細細粒坦言自幼為食致胖，她的童年和少女時期雖然是肥妹仔，但樣子非常可愛，她昨日在電話中說：「我衰為食，一日好多餐食唔停，食親都係高卡路里嘅食物。我好有衣食，怕浪費又餐餐清晒啲嘢，連汁都撈埋，我嘅肥係逐年遞增，一年十磅，之前報道話我220磅，𠵱家230磅啦，係呢個冬天送畀我嘅禮物。」
細細粒曾鞭策自己要與致肥食物絕交，但入冬即解禁再成好友。
肥胖曾令細細粒感自卑，她說：「正常男仔又點會揀個肥妹做女朋友，我以前見人拍拖好恨，我咁大個女未拍過拖，中學同出嚟做嘢識到心儀男仔都係暗戀人，亦唔敢表白，明知結果做乜丟呢個架？媽咪見我咁嘅身形都冇再催婚。」細細粒未拍過拖是否意味仍是未嘗禁果的處女？她怕醜細細聲說：「係呀。」不過處女細細粒樂得做剩女，她說：「𠵱家我反而唔想拍拖，我想拍多啲好戲，喺工作上有前途啲。」問到擇偶條件，細細粒說：「我唔知自己鍾意邊類男仔。」原來她對林峯和陳豪這些迷暈女粉絲的帥哥通通不過電，只情迷韓國偶像元斌和裴勇俊，閒時最愛煲劇。
細細粒憑《老表》上位，有指《法網狙擊》監製文偉鴻稍後開新劇也找她演出，細細粒說：「公司有book我期，但監製未搵我，要拍呢部劇都未減得肥住。」細細粒直言抗拒接拍咀戲，她說：「我諗會尷尬，我思想同尼姑一樣睇得好淡。」被封為女神的她自嘲是豬扒女神，她不介意幕前玩醜化，但鏡頭後都想成為真正女神覓到真愛，她日前便把一張16歲減肥後影的沙龍少女特寫照貼上微博與網友分享，驟眼望去索爆如AV女優。細細粒表示中學曾試暑假進行地獄式減肥，每日游水兩小時和只吃蘋果或菠蘿，結果成功殲滅40磅贅肉，最終抵不住美食引誘再增磅。
細細粒昨日邊工作邊嘆外賣凍飲，手口都冇停
細細粒在《老表》中戲份不多，但因身形脹爆一出場便甚搶鏡。劇照
放工即篤街邊檔
記者昨午到細細粒觀塘工作的道具公司，笑容可掬的她大方接受訪問，有傳她當年因失戀致暴肥，她一再強調說：「我真係未拍過拖。」見細細粒坐位旁的牆上貼了一張紙，寫上要與汽水、麥當勞和朱古力等食物絕交，但最近她卻又抵受不住引誘，她說：「佢哋變番我好朋友啦，所以呢排都肥咗，但為咗健康着想，同埋變成真正女神，有機會我想減到120磅，希望有纖體公司贊助我。」細細粒昨晚6時半放工，即急不及待去醫肚，她到附近街邊檔買了四串小食狂隊，稍微止餓才往取車回家。
From:
http://hk.apple.nextmedia.com/entertainment/art/20130120/18140286
