揚言計劃30歲結婚的「咪神」高海寧（高Ling），於大前日26歲正日生日竟然冇仔相伴，只好找來屋企人陪行街食飯慶祝。壽星女高Ling更不惜出錢又出力，除了當柴可夫外，還買衫給外婆及兩個細佬，對長輩又照顧有加，認真抵得諗！
高Ling親自接載外婆與胞弟到商場醫肚，順道慶祝其26歲生日。
港姐出身的高海寧（高Ling），成功憑34D逼爆身材上位，最近她在無綫劇《法網狙擊》被白健恩強姦，並露出大片白滑肉背，牽起全城熱話，亦因而令她人氣急升。大前日是高Ling的26歲牛一，不過dry爆的她為免孤伶伶在家過生日，當晚只好搵屋企人陪食慶祝。約傍晚6時半，素顏上陣、收起性感的高Ling，親自駕車載屋企人前往尖沙咀一個大型商場，包括其外婆及兩名穿上兄弟裝的胞弟。
途人認出
一行人先在該處時裝店行逛，高Ling先為兩個細佬揀衫，之後又到附近的運動店選購禦寒衣物，未幾便購下戰利品離開，當然全是壽星女付款啦！
孝順的高Ling出錢為家人選購衣物。
高Ling專心傾電話，未知是否監製致電安慰？
沿途見她對外婆非常照顧，全程翹住其手臂，間中又搭下膊頭，盡顯孝心！期間她被途人認出，並好奇地手指指說：「嘩！高Ling呀！」不過高Ling卻未有理會，繼續翹住婆婆行街。之後齊齊到附近一間泰國菜館開餐，逗留個多小時離開，高Ling又再充當柴可夫送眾人返回旺角寓所。
監製安慰
此外，高Ling昨日於電視城為新劇開工，問到生日如何慶祝，她表示約朋友食飯，提到有冇男仔約？她說：「冇男仔呀！清一色女仔。（點解？）我咁忙，費事累到人，我仲咁後生，唔心急拍拖。蘇民峰話我今年行緊大運，所以都係疊埋心水做嘢先，佢仲話我最快要2018-19年嫁得出，遲啲拍拖都冇所謂。」
對於《法》劇收視一般，她表示監製有打電話安慰，但自己沒有不開心，因有很多粉絲留言支持讚演技進步，並透露公司稍後一次過開兩套劇給她，她坦言擔心演技退步。
From:
http://orientaldaily.on.cc/cnt/e ...0116/00282_025.html
