無綫《十大勁歌金曲頒獎典禮》噚晚喺將軍澳電視城舉行，下晝一班歌手入去拜神，由於夜晚8點先開騷，所以好多女歌手都冇化妝素顏示人，曾經被封做宅男女神嘅糖兄妹組合成員糖妹（黃山怡），佢好有勇氣只係戴副小雲眼鏡出嚟，暴露晒佢面黃、深黑眼圈、暗瘡印、鼻有油光嘅真面目，唔知會唔會嚇走宅男呢？
糖妹面黃兼黑眼圈，咁嘅狀態都敢以素顏示人，真係好勇。
HotCha成員Winkie嘅素顏look都好趕客，全黑嘅佢雖然戴咗黑超，但都遮唔到佢嘅冇眉憔悴樣，好似老咗10年咁，真係嚇親人！相反，蔡卓妍同關心妍（Jade）嘅素顏look就冇乜走樣，屋企做美容嘅Jade唔知係咪做得facial多，皮膚白裏透紅。
欣宜認翻脹
至於鄭欣宜都係戴黑超遮掩，對於有指佢翻脹40磅？欣宜話：「我係肥咗，但報道有少少誇張，朋友嚟香港玩我先會食嘢放肆咗，又夾唔到時間做機，不過多謝爸爸撐我。」欣宜仲講笑話想做減胸代言人㖭。
撰文：馮仁昭
HotCha成員Winkie雖然戴黑超，但依然遮唔住佢個殘樣。
欣宜認自己肥番，但就否認翻脹咗40磅。
From:
http://hk.apple.nextmedia.com/entertainment/art/20130114/18133133
