舒淇近期密密出動宣傳周星馳新片，有傳視舒淇為女神的周星馳，更懶理馮德倫力追舒淇。舒淇昨日在中環笑言「聞唔到追求嘅氣味」，但不忘大讚星爺有才華，更加不算孤寒，噴的香水都好好聞，但一提到正印男友馮德倫，舒淇即收口不肯再講。
舒淇昨日穿上花花大露背裙，以全球代言人身份到中環宣傳香水，舒淇與品牌兩位高層在狹窄的走廊位影相時，不慎掃落背後的香水，跌滿一地，舒淇尷尬臉紅，更不好意思地親自蹲下執拾。提到舒淇性感大露背宣傳，可是酬勞豐厚？她笑說：「如果酬勞多，唔止露背㖭！」舒淇指與品牌三年前曾合作，今次再合作在塞納河畔拍廣告，意境美麗。
「好多係傳聞」
舒淇正拍攝侯孝賢的古裝片《聶隱娘》，與阮經天和張震合作。剛合作完的周星馳被田啟文力數孤寒，舒淇則扮儍：「係咩？係呀？唔知喎，我feel唔到佢孤寒。」她指拍片時，周星馳代表劇組經常萬歲。有傳周星馳和馮德倫（Stephen）有積怨，所以硬撬牆腳追求她，舒淇說：「冇喎，聞唔到追求嘅氣味喎，好多都係傳聞。」如果追求呢？她說：「冇如果，有如果呢個世界就唔會咁亂啦。」
舒淇笑言酬勞更高，可以更性感。
舒淇近日頻頻與星爺宣傳新片。資料圖片
胡扯不提男友
不過舒淇補充指有才華的男人都吸引人，她說：「噴香水嘅人都吸引人，氣息係好特別，我就唔鍾意太刺鼻嘅，熟悉嘅氣味會令人有溫暖感覺。」問她Stephen有否噴香水？她即鬼馬搶答：「Stephen Chow（周星馳）？周生都有噴香水，味道都OK。」Stephen Fung？她即收口：「唔係宣傳範圍，我唔講。」隨即轉講香水經，指香水代表性格，又曾試過在靚餐廳遇到臭狐侍應倒胃等。
From:
http://hk.apple.nextmedia.com/entertainment/art/20130111/18129939
