CoCo細心聽售貨員介紹，希望搵到啲更滋潤嘅面膜。
經介紹後，CoCo諗都唔使諗，即刻掃光貨架上嘅蝸牛面膜（小圖）。
【灣仔】四哥謝賢曾經同拍拖多年、月中就28歲嘅女友CoCo傳過分手，原來佢哋仲係打風都打唔甩，日前夜晚8點幾，四哥就專登揸架靚車載CoCo去灣仔莊士敦道間連鎖店買日用品。
唔知係四哥戴住黑超睇得唔清楚，定係佢好細心想方便女友行少兩步，就算嗰度係雙黃線佢都好少理，唔怕抄牌照畀CoCo落車，然後就將車停埋一邊等，仲趁空閒煲吓雪茄。
CoCo豪氣
不過，等咗冇耐，四哥就俾人趕，佢惟有揸走架車兜圈再返去，CoCo就喺連鎖店入面揀面膜，其間佢問店員有乜好介紹，當店員介紹咗一隻蝸牛面膜後，CoCo諗都唔諗就將貨架上啲蝸牛面膜掃晒，鬼咁豪氣，掃完貨嘅CoCo好滿足咁離開，而柴可夫四哥早就返咗去等女友，CoCo上車後四哥即開車離開。76歲嘅四哥保養得咁好，莫非CoCo買嘅面膜係畀四哥用嘅？
【今日我至潤】76歲嘅四哥喺車等女友CoCo買面膜，相信四哥保養得咁好，除咗有愛情滋潤，仲有CoCo買嘅愛心面膜敷面，雙管齊下，有乜辦法唔潤！
四哥喺車上煲雪茄消磨時間，當CoCo出現即刻準備開車。
From:
http://hk.apple.nextmedia.com/entertainment/art/20130107/18125405
