恒基地產（012）主席、「四叔」李兆基昨日出席港大活動時，大談新一年本港樓市及股市展望，由於政府連環推出辣招，面對突然冷卻的樓市，四叔對樓價看法亦轉淡，只預計今明兩年會升5至10%，明顯較三個月前預測未來兩至三年最多升20%的看法審慎。
四叔去年10月曾以「遠水不能救近火」來形容政府土地供應太少，令樓價不斷上升，昨日他仍強調樓價始終會企硬，「跌就唔會跌啦，因為建築費一日貴過一日，3000幾蚊一呎，樓價唔跌得！」
籲免補價 農地起平價樓
儘管四叔去年仍睇好後市，當時認為樓價未來兩至三年最多升一至兩成，但踏入2013年，四叔預測樓價的看法明顯轉淡，「以前就話貨疏，搞到樓市炒得旺，但呢一兩年嘅供應真係多咗，我覺得樓價係會變得循序漸進，嚟緊樓價一定唔會再離譜，升就有得升，但只係升少少，好似今年就只會升5至10%，明年最多都係5至10%。」
他又不忘為新界東北發展向政府「吹風」，呼籲政府配合其農地改建計劃，「如果政府肯免補地價，畀我用耕地起樓，咁我會起多啲100萬嘅平價樓，300呎每個月供5000，定息三厘供30年，乜人都負擔得起。我希望大家講少啲乜乜霸權，如果大家快脆咁買到細間嘅樓，社會就少啲爭拗，大家都開心啦。」截至去年6月底，四叔旗下恒地於新界東北有近510萬方呎土儲。
股市方面，四叔表示有信心今年6個月內，恒指會升至26000點，年底前希望挑戰28000點，但他今次並無給予「貼士」大家買那種類型股票。另外四叔承諾，若恒指升至30000點，就會每年捐10億元做善事，「不過出年應該都唔得啦！後年都唔知得唔得啦，哈哈！」
CY能否做足五年「唔知喎」
對於梁振英即將推出任內首份施政報告，四叔亦對CY「贈兩句」，「希望佢可以再做多啲，同埋可以做得好啲！」問及會否支持政府，他笑稱，「冇話支唔知支持嘅。」至於被問及元旦遊行叫CY「落台」，以及CY能否完成五年任期，他則以「唔知喎」及「呢啲唔講啦」作回應。
From:
http://hk.apple.nextmedia ... 130107/18125679
