歌手連詩雅（Shiga）出道僅3年，先後與太子爺郭永淳、師兄周柏豪、Rapper曲尺及歌手關楚耀傳緋聞，兩度傳出做「小三」，更被網友封為「姣精」。Shiga坦言清者自清，不會介意，她說：「係啲人對我產生咗誤會。」面對困難逆境，Shiga均會跑步將不快抒發出來，以免鬱在心中。
雖然被封「姣精」，但連詩雅不會受閒言閒語影響自己。
真心友不見面亦相知
面對負面新聞會樂觀啲去諗，除咗負面仲有好多好嘅新聞，會用最正面方法對待，唔好諗太多，但始終我都係人，會唔開心同喊，但好快喊完就用正面態度面對唔好嘅事。跑步幫我好大，唔開心、遇到困難都會去跑步，令頭腦清晰啲，將唔開心嘅嘢抒發出嚟，情緒上一定受影響，未去到抑鬱，但個人收埋咗好多，以前係一個比較樂天嘅人，好多時會大笑、大癲大肺，依家會小心咗，未必好似以前咁開心，我係鍾意報喜不報憂嘅人，對住身邊朋友唔會講唔開心嘅嘢，但自己收埋自己時間多咗，以前好鍾意約朋友出街、食飯、娛樂，依家多留係屋企，同隻狗傾偈。
好好彩，身邊朋友都識咗好多年，大家都知道我嘅工作，當然有啲唔了解嘅會覺得我入咗行變咗，少咗搵佢哋，但有好多好好朋友令我更珍惜呢份友誼，完全了解我，真係心照囉，呢兩個字以前成日聽，依家感受到背後意義。朋友對我嚟講好重要，有時真係冇辦法，依家工作係我第一位，好想快啲可以畀一個好好生活環境、少少成就令屋企人冇咁辛苦，依家做所有嘅嘢都係工作為先。
連詩雅對女仔會主動傾談。
連詩雅認為感情事毋須向外人交代。
連詩雅遇上不開心時，會以跑步趕走負面情緒。
連詩雅入行以來，分別與關楚耀及周柏豪傳緋聞。
小三傳聞係流料
好多新聞話我係第三者，都唔係真，好多時人哋唔清楚來龍去脈，尤其感情同私人嘅嘢我覺得唔需要交代，雖然我係公眾人物，我會將手頭上嘅嘢盡量做到最好，私生活或感情嘢盡量低調。錫我同真心了解我嘅人係唔會因為少少報道對我產生誤會，如果有用時間了解我、睇我做嘅嘢同留意我嘅歌就會知道我係咩人，如果一啲聽少少表面嘢就定咗我一個印象，咁其實嗰啲人將來聽到少少唔好嘅嘢就會覺得我個人係唔好。
周柏豪（左）
連詩雅與媽媽乜都傾得到，有如朋友。
被動型對女仔較熱情
網民以姣形容我，我冇乜點介懷，以前會睇網上評論，見到啲人講少少負面嘅嘢就會唔開心，身邊有好多行內嘅前輩同師姐同我講，你係唔會滿足到全世界，最緊要自己對得住自己，唔好諗太多人哋講啲乜嘢。其實我對於異性係比較被動，所以工作怕人有誤會，同男仔特別少嘢講，同女仔比較熱情，慢慢會覺得我做嘅係娛樂圈，有時唔可以太過靜、唔出聲，啲人會覺得我Cool、唔友善。但其實我個人唔係咁，認識我嘅人知我成日講嘢。
其實我對女仔一定會主動，就算係咪入行都會主動，以前細個獨女會比較怕醜，見幾次先埋去傾偈，依家人大咗，又投身社會打工，之後好咗好多，女仔會主動走去傾偈，男仔就反而會少啲，見好幾次或者朋友介紹先會傾偈。我諗唔好話淨係男仔，身邊所有嘅嘢都會加緊小心，就算同朋友，朋友唔係男仔就係女仔，同一個男仔朋友影咗張相，因為我係藝人會放大十倍，一張普普通通同十幾年朋友嘅合照會變成緋聞男友，會將身邊所有私人嘢特別小心處理。有時會擔心朋友怕我麻煩，好彩佢哋會明白我，從來冇諗身邊人會攞合照出嚟為宣傳自己，入行呢幾年發生所有事，唔覺得專登利用我去做任何嘢，但係如果我遇到啲咁嘅人，我都會幾失望，當然希望唔好發生係我身上。
自細「母」距離黐身乜都傾
雖然媽咪比較大年紀生我，但同媽咪Keep住好似好友嘅關係，可能我係獨女，由細到大都好黐媽咪，咩事都會傾，佢會好關心我，唔會令我覺得有母女嗰種距離。其實父母喺我十幾歲先分開，讀書時覺得自己比同年小朋友諗嘢多，我比較早開始打工同做暑期工，依家都有同爸爸聯絡，但少啲見。
其實喺呢個年代父母分開係平常事，身邊好多朋友都有咁嘅Case，佢哋都話因父母分開而對感情冇信心，對我係冇呢樣嘢，如果佢哋明明唔夾，因為我夾硬一齊，咁我更加覺得佢哋辛苦，我寧願佢哋各自有自己生活，開心番仲好。
自己嘅愛情觀反而因為身邊朋友嘅經驗令自己唔明白愛情，好多朋友拍咗好多年拖，然後結婚，但突然有啲事而分開，各自有新感情，會令我覺得咁易去愛另一人，之前嗰段感情好脆弱，令我對愛情多咗好多疑問，橫掂自己唔會諗拍拖住，事業行先，呢段期間唔好諗咁多。
From:
http://orientaldaily.on.cc/cnt/e ...0105/00282_044.html
