羅仲謙在電影《古惑仔：江湖新秩序》演陳浩南，觀眾會否想起鄭伊健？
冷飯只要炒得香一樣好食，楊過同姑姑都換過無數面孔，16年前鄭伊健演陳浩南《古惑仔》，今天換了羅仲謙，再由王晶操刀，翻拍電影《古惑仔：江湖新秩序》，一樣有機會劈出一條新血路，當年謝天華、陳小春不也是無名小卒。謙仔說：「我想有一日行出街，啲人叫我浩南，唔係叫羅仲謙！」
《古惑仔：江湖新秩序》上映日期：1月10日
幾多經典電影不是翻拍又翻拍？故事不嫌舊，關鍵在包裝，王晶今次找來文雋聯手監製，起用羅仲謙、梁烈唯、沈震軒等一班影壇初哥演出電影《古惑仔：江湖新秩序》，他依然滿有信心，王晶日前接受本報記者專訪時說：「電影路難行，但永遠需要破舊立新，包裝都要新，有幾多荷李活電影唔係不停重拍？佢哋幾個表現都好好，我今次忠於原著接近漫畫故事，同鄭伊健版好大分別，再講規條內訌念詩，冇人有興趣睇，所以我唯一要求係謙仔做個唔同嘅陳浩南。」
王晶：兩版本畀戲院播
黑幫片包含暴力色情粗口原材料，如要拍得到肉，必是III級版，王晶決定同時推出IIB和III級兩個版，他說：「戲院可以上普通同3D版，點解我唔可以剪兩個版畀戲院播？觀眾永遠鍾意多選擇，入面有好多粗口橫飛、劈友爆樽暴力，有好逼真拍嘅床上戲，一定係III級。」
王晶（中）能否成功捧伍允龍（左）與羅仲謙上位，拭目以待。
新一代古惑仔，能否再創神話？
王晶已部署好第二、三集古惑仔系列，羅仲謙能否如昔日的鄭伊健般成功靠此上位？謙仔說：「希望觀眾畀啲空間我哋呢班後生仔，能夠將呢個經典延續落去，我的確寄以厚望，已經催開拍續集，我想有一日行出街，啲人叫我浩南，唔係叫羅仲謙，咁我就成功，最好吸納埋老中青fans。」謙仔在戲中演未上位的泊車仔陳浩南，除了人物性格外，外形更有大分別，謙仔笑言大家都變成潮人：「我哋啲服裝好摩登，不過我想第二集可以好似鄭伊健咁着番皮褸。」
謙仔：同伊健比有壓力
謙仔續說：「性格方面同以前個版就有好大分別，鄭伊健版我係由細睇到大，好彩我做未上位前嘅𡃁仔，兩個好唔同感覺，不過外邊一樣會將我同伊健比較，我會有少少壓力。」
此外，伍允龍演大頭仔一角兼負責武指，謙仔經常拉着他度招，謙仔說：「我叫佢千祈唔好度到有晒招式，爛仔交邊有招式，但原來爛仔交都要經過設計，古惑仔開片一定會用到摺凳，所以我都有要求伍允龍度動作時，畀我用到呢個十大武器之首。」
From:
http://hk.apple.nextmedia.com/entertainment/art/20130105/18123439
