週日（30日）凌晨天寒地凍，霎時間由日頭嘅22度急跌至15度，FBI行經紅磡碼頭，竟然見到高海寧拖住位伯伯喺海邊有講有笑，拍拖拍到咁揚？嚇死！原來無綫新劇《傳愛事務所》拍緊外景。
當晚凌晨十二點幾，俾高Ling狠飛嘅打工仔陳豪做柴可夫司機，喺紅磡碼頭放低佢後就揸車走，即係陳豪拍咗三個take就可以鬆人返屋企搵陳茵媺取暖，留低紅噹噹嘅高Ling好雀躍咁走埋去胡楓身邊，一埋身即刻同飾演有錢佬嘅胡楓整番靚個bow呔、攬一下，再錫一啖，然後兩個就拖住喺海邊漫步。FBI聽聞，高Ling因為聽教聽話、演技又有進步，所以喺《傳》劇入面嘅戲分直迫女主角陳法拉。睇佢當日先同陳豪車廂談情，再攬錫胡楓，咁鬼戰鬥格，升呢做女一遲早啦！
當晚陳豪淨係負責車高Ling去碼頭後就收得工，之後就急急腳走人，咁又係，天寒地凍，返去陪女友好過啦！高Ling有樣有身材，當日下午出席完商場活動，緊接凌晨又去拍劇。上緊位，有排忙。
41歲舔舔脷~當晚氣溫突然急降，天氣又乾燥，開機前陳豪亦不斷伸脷舔嘴。唔係對高Ling舔舔脷，係防爆坼咋
80歲半夜攬錫《傳》劇講述高Ling為咗黐有錢佬胡楓而狠飛陳豪，26歲高Ling更大街大巷攬錫80歲胡楓，你睇修修個樣幾受落！
拖實胡楓~未埋位嘅高Ling都拖實胡楓，識做得嚟又敬老，抵錫。
