眨吓眼，邱淑貞做咗沈嘉偉老婆已經十三年，先後同老公生咗三個千金，雖然追極都唔係仔，但兩公婆感情十年如一，幸福少奶四粒字，當之無愧。
上星期二（十二月二十五日）聖誕假期，一家五口，拉隊踩去銅鑼灣利園商場Bonpoint掃減價童裝。當然，身為上市公司老細，大有條件唔睇標價想買就買，但呢個法國頂級細路品牌，四位數起跳之餘萬萬聲一樣大把，唔趁on sale入番啲貨補充吓屋企個衣櫃，先至笨。
兩公婆加兩工人湊住三個女，十一歲大女沈月同八歲沈日見慣鏡頭淡淡定，得兩歲幾嘅細女沈星，一樣冇怕醜，生得好樣又精靈，喺鋪頭入面騰來騰去，就算工人抱番住，佢都要扭落地，非常生猛。
揀完試試完買，由揸數嘅沈嘉偉俾錢，之後再操兵walk過去I.T旗艦店，自己地頭，今次主力掃鞋，最終六、七袋走。
平時見到鏡頭十居其九避得就避嘅邱淑貞，是日表現大方，閂車門前仲笑晒望鏡揮手。女星嫁得好又幸福，要講命數，邱淑貞就係修得到。
由利園行過去Bape Store，鍾意自己行嘅沈星俾媽咪拖住，去到鋪頭，拗後扭計要落地，唔想工人抱。
新衫試上身，沈星自己埋位揀鞋，手拎一對再望其他。邱淑貞細女沈星未夠三歲，陌生人影相佢唔驚又唔怕醜，超得！
同老公坐前排嘅邱淑貞，上車坐定仲揮手bye bye先閂門。自己地頭任攞，六、七袋大豐收，主力掃鞋。
