強積金——回報低，收費高，有「強迫金」、「強姦金」之稱，一眾被「㩒住搶」的打工仔，只有滿腔憤怒。
因無黨派而被稱為「四散人」（另三人為林大輝、梁家騮及謝偉銓）之一的立法會保險界議員陳健波，認為與其閉翳，不如諗計。原來他私底下精於玩強積金，七年間累積增長三成，高過平均數一倍，人人請教，但他作風低調，從不肯教人，最怕輸了被人找晦氣，「你自己研究完，輸咗無得怨嘛！」他最近終向本刊透露他的MPF秘笈。
○八年當上立法會議員之前，陳健波在恒生保險部工作了三十多年，他看準人壽保險發展空間大，九五年主動提出向滙豐購入經營牌照，短短十年間，人壽保險營業額由最初的三千萬變成十三億，他亦如坐直升機般，由副主任升至銀行助理總經理；二千年他再為恒生成立強積金部門，今日已成為業內五大龍頭之一。
○五年他轉投全球最大的再保險公司慕尼黑，成為該行首個華人行政總裁，並首次為自己的強積金供款。不過他當時嫌麻煩，將所有供款隨便放入一個定息基金，從未打理，到○九年辭職專注做議員時，才發現不妙，「四年間先得百分之七增長，即係一年得百分之一點九，通脹都追唔上，你話係咪㷫過炭！」自此，他的起心肝鑽研。
陳健波的強積金策略之一，是化繁為簡，只持有兩個基金組合，互相調配。他笑言以自己五十八歲之高齡，其實股票比例不應如此高。
專攻港股基金
吊詭的是，他竟然無揀自己創辦的恒生強積金，逢人問陳健波轉邊間好，他一定答細公司永明，並且將三個助理的強積金轉投其下。「我無利益衝突㗎！揀基金好睇主持人，佢（永明）嘅基金經理好出名，好多年都被選為基金之星，所以佢隻港股基金，差唔多係全港跑得最好嗰隻！」該基金由有「長勝將軍」之稱的首域大中華投資總監劉國傑打骰，去年增長約百分之二十一，雖然表現並非最標青，但成立十二年來，累積回報超過三倍，遠遠拋離同行。
「其實強積金來來去去咪又係六種組合（股票、債券、混合、保證、貨幣市場『即定息基金』及指數），保證、貨幣市場基金一定輸通脹，債券基金遇美國加息又會跌價，一定係股票基金先有高回報。」和大部分香港人「唔熟唔食」的心態一樣，他獨沽一味只揀港股基金，其他地區免問；看好股市時，他將所有錢專攻港股基金，風高浪急時，就將錢泊入定息基金避避風頭。
最壞往往最好
「睇市主要睇息口變化，一○年底股市升到二萬三、四千點，牛皮咗成幾個月都升唔上，之後中國加息，內銀股可能受拖累，我手上八成五都係股票，當然好小心。」結果他在上半年分三次減持股票，成功在前年底歐債危機惡化、港股跌至全年低位一萬六千點前散貨。所謂力不到不為財，買了好的基金也非一勞永逸。自知股市猶如鱷魚潭，陳健波日日睇住市，幾乎每隔三、四個月就將強積金轉倉一次，每次在港股及定息基金間調配比例，「通常第二日就轉到，無乜時間風險。」
到去年一月，他見股價低殘但股息至少四、五釐，又開始小試牛刀入市；到五月希臘大選失敗，「脫歐」之聲不絕，港股一個月內大跌三千點，但陳健波最淡定，一個月內三次大執平貨，增加強積金中的港股基金比例，「當時個個都唱會繼續跌，之後真係跌一浸，但你永遠無可能捉到最低點，見佢比較低就好買！」當時長實（1）跌穿九十元至全年低位，市盈率只得四點四倍，工行招行亦是七、八倍，「最壞嘅時候就是最好嘅時候，個個都驚我仲定添，當時都唔想睇報紙，費事影響自己判斷。」
唔識揀 選指數基金
訪問中，陳健波常掛在口邊的一句是：「買股票唔係咁容易學，個市日日變，我個腦不斷轉，睇住事態發展，成日改變主意，朝早同夜晚諗嘅可以完全唔同。」
他建議完全不熟股票的打工仔，不如揀指數基金，「畢竟長期跑贏大市嘅股票基金唔多，而指數已消化了股票表現、成交量，好的股票納入成分股，唔好的踢走；好似恒指有咁多隻成分股，就算有一、兩隻周期性跌，你都唔會好傷！」
由於指數基金只須跟貼所掛鈎的指數，毋須投資經理管理，所以營運成本較低，收費一般為百分之一，較強積金平均收費的百分之一點七四便宜，「以前投資股票每年有一成回報，而家要現實啲，一年有百分之六、七已經好好，所以啲收費慳得就慳！」恒指去年七月谷底反彈後，一直氣勢如虹，他看好今年大市愈升愈有，暗示港股基金有運行，「今年上半年我都睇好個市，而家息咁低，又無得炒樓，仲有咩炒？」
