由美味天使「柑桔」轉咗做歌手嘅陳蕊蕊，雖然唔係一、二線歌手搵錢唔多，而味之天使「香蕉」王淑玲，一直以嚟喺無綫只係做埋啲三、四線閒角，估計月薪只係一萬左右，但前日記者竟然見佢哋兩個人孖住喺銅鑼灣狂掃Chanel，兩個人忽然變得好富貴。
【今日我至豪】兩個天使妹豪買名牌，陳蕊蕊（右）揀手袋好鬼認真，反而身邊嘅香蕉掛住玩電話。
五袋戰利品
前日下午5點幾，記者見陳蕊蕊同香蕉入咗銅鑼灣利園Chanel睇嘢，兩個人好似自由行咁狂揀手袋、銀包、耳環等飾物，黑色、白色同紅色乜都睇一餐。其間陳蕊蕊攞起一對對耳環拼嚟拼去，又拎手袋拼埋身左擰右擰，然後用手機同香蕉互拍，十足十做花生騷咁。
陳蕊蕊同香蕉兩個人不時問對方意見，然後哈哈大笑，咪以為佢哋只係齋睇冇幫襯，二人喺Chanel只係逗留咗半粒鐘，離開嗰陣陳蕊蕊挽住三袋Chanel，而香蕉亦挽住兩袋戰利品，直情好似啲闊太買嘢咁豪爽，真係唔到你唔服。
From:
http://hk.apple.nextmedia ... 130101/18119287
