賭王何鴻燊四房兒子何猷君日前被《好報》獨家拍得與女友Francesca煙韌拍拖，當日猷君只身穿波衫拖鞋，期間又掛住玩電話，Francesca只好施展冧功又翹又拖男友，令猷君最後乖乖攬住女友專心行街。事後猷君接受本報訪問，坦承與女友感情穩定，並透露爹哋亦很喜歡Francesca，全因女友夠靚女！
Francesca張開雙手撒嬌要猷君攬攬。何猷君與女友Francesca十指緊扣行街街。
何鴻燊與四太梁安琪的兒子何猷君，跟西班牙籍女友Francesca拍拖約一年，但感情一日千里，二人近日更趁住聖誕及新年假期齊齊回港度佳節，日前還被《好報》獨家拍得他們煙韌行街街。事後猷君接受本報電話訪問，坦言不知道被偷拍：「大家影到我已經好好彩，我要準備考試好少出街。（你着住波衫？）哈哈，我成日都着波衫。」
直認二人感情穩定
由於兩小口子當日表現恩愛，問二人感情是否很穩定？他不諱言：「係。（聖誕節點慶祝？）冇呀，都係忙溫書，我都係同屋企人食餐飯，佢（女友）自己都要同屋企人過，咁佢都未夠18歲，大家要各自陪屋企人。」至於除夕夜，猷君笑言都要溫書，還未安排其他節目。問到爹哋是否很喜歡Francesca？猷君即忍不住甜絲絲笑說：「鍾意，佢唔會反對，呢個係我choice嘛，加上爹哋鍾意外國人。（覺得Francesca夠靚女？）哈哈，呢個係其中一個原因。」
何猷君（後）笑言女友獲爹哋首肯。猷君輕攬女友腰肢，十分甜蜜。
文：名人組
From:
http://orientaldaily.on.cc/cnt/e ...1229/00282_078.html
