入行四年dry爆的高海寧，最愛聖誕佳節可不顧儀容與大班朋友狂歡，不過稍後情人節將至，高Ling也想識個男友來充撐場面，不致人有我冇感覺寂寞。
高Ling坦言明年是自己事業高峯期，暫時仍然係工作重要點。高海寧已經四年幾未拍過拖，簡直dry爆，難怪佢笑言希望趕得切搵個男友過情人節。
現年25歲的高海寧（高Ling）雖是個愛幻想的女孩，但早前12.21末日論四起，她卻沒擔心末日來臨要怎樣準備。她說：「傳言話三日冇陽光處於黑暗時期，我冇諗過會係點度過，只係諗過若果係真，咁三日後嘅平安夜、聖誕節更加應該開P慶祝。」是以高Ling已約好一班舊同學今晚開派對過佳節。
甚有童真的高Ling，見到卡通公仔開心笑到見牙唔見眼。
愛玩搞鬼派對
自08年入行後，高Ling只傳緋聞沒真正拍過拖，問到想不想佳節有男友相伴？她坦言：「又唔使喎！聖誕節我鍾意一大班朋友開派對狂歡，舊年同啲同學玩搞鬼派對，玩絲襪笠頭，唔使理醜唔醜樣，玩得好開心，哈哈……就係冇男友更加要搵朋友開派對嘛。」高Ling笑言聖誕節不需二人世界，但情人節就不同，幸好還有兩個月時間讓她搵情人，她說：「情人節前身邊啲人個個都做準備，好似好大件事咁，搞到我都覺得自己一個人寂寞，不過相士話我2012、13年事業運行到高峯，所以唔使諗，做嘢先！」
From:
http://hk.apple.nextmedia ... 121225/18112758
