夜麻麻，行完街，最怕餓搵唔到好嘢食，開到凌晨1、2點，甚至最激4、5點的串燒店，呢排愈開愈多，環境四四正正，不少開正喺旺區如銅鑼灣尖咀，明益夜鬼食客，仲完全冇串燒油煙味，貪靚鬼都受惠。
鹽燒銀杏$20
燒鵪鶉蛋$18
心燒龍串鳳$34
燒白鱔$58
燒麻辣鴨舌$28
燒豚肉廣島蠔$46
串燒專店80款
心燒食堂佔地兩層，老闆Aska多年前為記者，後從事廣告，識落人脈，所以不時有同行幫襯，連Wyman、杜汶澤都來過！店名「心燒食堂」更是Wyman手筆。店內提供80款串燒選擇，最特別是以店名命名的心燒龍串鳳及燒酒釀雞子，坊間少見，龍串鳳會將雞中翼去骨，再釀入蝦仁；燒酒釀雞子則會用上幾種酒浸兩日兩夜入味，幾十蚊貨仔都勁用心。
除了食物，Aska亦把小店打造成藝術平台，現時放滿香港著名鉛筆畫家Paul Lung的貓畫；而本月中旬，則會轉放畫家小克的畫作。最近Aska亦推出帶長者獲9折優惠，宵夜同朋友嚟夜晚帶長者再嚟都得，真係變食堂！
麻辣燒一口蝦（8隻）$68
加入四川調味粉及孜然粉，味香濃郁，可連殼食，脆卜卜，勁惹味！
燒豚肉廣島蠔$46
豚肉加入日本醬油去燒，包裹鮮甜蠔肉，佐酒佳。
心燒龍串鳳$34/燒酒釀雞子$28（左）
話明係龍串鳳，當然有兩種材料，用上去骨雞中翼釀入蝦乾，蝦乾鹹香及雞肉燒香二合為一；雞子則用上花雕、日本清酒及味淋浸兩日兩夜，酒香入味。
柳俊江前新聞記者都幫襯
我每個星期有一日green day，所以推介呢度的心燒炒飯，以齋菜入饌，正！
環境：有獨立包房亦有開放空間，地方骨子，燈光柔和，好relax，亦唔會有串燒油煙味！
串燒：提供多達80款串燒，包括少見的心燒龍串鳳及燒酒釀雞子。
新推介：即將推出4款串燒連飲品套餐，售價$138(套餐串燒不包括黃鱔及鷹倉魚柳)。
心燒食堂
地址：銅鑼灣駱克道487號駱克駅22-23樓
電話:2383 8686
營業時間：星期一至六：12nn-3pm，6pm-2am；星期日：6pm-2am
炭爐任燒 美國厚切牛舌
川醇位於尖沙咀商廈，一半為露天雅座，雖然周圍都是大廈，但貼得唔近，冇侷促感覺。川醇老闆Lawrence12月推出了一個石窰炭火燒套餐，有前菜海膽胡麻豆腐及讚岐烏冬之餘，成個炭爐搬上枱任你燒，客人變師傅，而且材料矜貴，包括美國特級厚切牛舌、特級M6和牛粒及日本黑豚五花腩等，由晚上6:00提供至凌晨1:00，天黑黑兩個人竄上嚟都得。
美國特級厚切牛舌（右）/特級M6和牛粒（中）/日本黑豚五花腩（左）$498/2人(套餐價)
套餐包括日本珍珠元貝、日本廣島蠔、虎蝦、鮮白鰻、甘薯共8款選擇，仲有埋2道前菜及烏冬，唔單只食宵夜，未食都夠飽肚！
燒牛舌（跟套餐）
厚燒牛舌入口柔韌﹐勁有嚼勁。
黑豚肉滿布燒黑椒味，多吃本來熱氣，但巨峰提子的清甜，有效中和油分，甜甜哋又好肉感，好match！
燒日本廣島蠔$46
以自行調配過的醬油去燒，最後還會加入辛子絲，汁香四溢之餘，微微帶辣。
川醇師傅Alan
套餐用上石窰炭火爐及無煙炭，燒起唔會好大煙，推介厚切牛舌啖啖肉，冬天最啱！
食客Shelia文員
我平時鍾意同朋友上嚟飲嘢吹水，呢個露天area唔侷促，我最鍾意！
環境：有室內座位及露天座位，露天座位提供暖氣，唔怕吹親。
串燒：串燒有燒腐皮溫泉玉子及腐皮蝦膠臘腸卷等，較特別。
新推介：12月推出炭火燒套餐，連前菜、烏冬及8款食物，售價$498，供2人用。
川醇Chuan Alfresco Bar&Restaurant
地址：尖沙咀厚福街12-12A藍馬商業大廈5樓
電話：2311 0123
營業時間：星期一至日:18pm-3am
Hea食 燒大白鱔
侘寂乃日本美學一部分，指寂靜樸素的東西，位於銅鑼灣的侘寂，同樣有日式寂靜之美，環境簡樸安靜。
老闆兼師傅Victor，曾在英國讀書，與日本人同住，深深愛上當地文化，所以連開店都改個日本名，另一老闆Travor加入後，主張行舒服到hea路線，所以呢度的侍應，不會像坊間食肆，趕頭趕命收你碟，一副趕客mode，反而會由你慢慢飲嘢吹水。串燒選擇較為大路，包括燒大黃鱔及雞翼等，材料全由Victor因應需要每天購買，非常新鮮，而且不留過夜，好似當日想影花魚，已經賣晒冇貨啦！
汁燒白鱔$48
白鱔皮脆肉嫩，肉地超厚，入口啖啖肉，非常滿足。
汁燒雞翼$28
加入秘製醬汁去燒，甜甜哋又有焦香味，好正！
燒秋葵$38
用上岩鹽去燒，秋葵籽卜卜脆，勁好咬口。
鵝肝石窩飯$128
除了串燒，這兒亦提供石窩飯，飯焦香口，配埋鵝肝甘香，唔覺唔覺食多咗。
食客Claire＆Timothy研究生
平時行到夜，我哋都會上嚟食宵夜飲兩杯，最鍾意個燒雞翼同鵝肝飯，貪佢香口。
侘寂老闆兼師傅Victor
推介汁燒白鱔，用上新鮮活鱔再加入調配過的甜醬汁去燒，厚肉地唔在講，分外香口。
環境：牆身掛有日式竹蓆及購自日本的藝伎poster，中間則有沙發，啱三五知己坐，好好hea。
串燒：燒串燒選擇大路，但勝在用料新鮮，師傅每天購買。
新推介：將會推出荔枝煙肉卷。
侘寂Wabi-Sabi
地址：銅鑼灣軒尼詩道499號永光商業大廈14樓
電話：3487 0837/ 9577 1779
營業時間：星期一至日：6pm-4am
川味串燒 海鮮蔬菜多
紅磡向來美食多，民泰街大部分食店，更是開到凌晨一兩點，夜夜笙歌。最近此街開了一間燒烤專門店，主打川味串燒。為提供正宗川味，師傅阿俊特地前往當地，在眾多調味粉中選出最好的孜然及辣椒粒，親自監督攪碎，再自行調配，店內串燒靈魂所在。
除了大路豬牛羊，這兒亦提供大量海鮮及蔬菜，最特色如燒龍蝦、燒毛茄及菠蘿等，選擇都咪話少！
涼拌皮蛋$12
上加經過自行調配的豆辦醬，鹹鹹酸酸，令皮蛋更突出。
豬頸肉$12/牛脷串$22/雞腎串$12/羊肉串$13/雞軟骨$12
孜然香味濃郁，離遠都聞到。最正是牛脷，咬落卜卜聲，但唔會太韌。
燒韭菜$10（左）/燒毛茄$12（右）
燒菜類最怕燒乾水，但韭菜仍能保持菜汁，毛茄則入口爽脆，孜然香濃烈。
燒龍蝦$98/隻
龍蝦芝士味濃郁，更可以食到拉絲，玩pizza效果！
清酒貴妃蚌$68
以日本清酒入饌，酒香不算濃，但勝在蚌身夠大，啖啖肉。
乾一杯師傅阿俊
推介燒龍蝦，用咗兩隻芝士，可以食到拉絲，外邊好少有。
食客Rick&Giann酒吧侍應
呢度嘅海鮮好新鮮，平時我哋唔嚟紅磡，為咗食呢間嘢先嚟。
環境：地鋪向街，但不臨馬路，尚算寧靜，店內燈光通明，凌晨都好似早上咁。
串燒：主要為川味串燒，孜然及辣椒香味濃。
新推介：燒鵪鶉，$38一隻。
乾一杯重慶串燒
地址：紅磡民泰街40號安華樓地下k2號鋪
電話：26271980
營業時間：星期一至日：5pm-2am
