隨住吸金后佘詩曼離巢，花旦買少見少，為開拓財源，無綫近年積極捧二線女藝人上位。本刊日前收到一份絕密騷價表，不但發現藝人騷價比去年大幅調升，排位亦大不同。
兩大高登女神岑麗香和苟芸慧的騷價，竟然比入行七年的陳法拉還要高，起錶價6萬，酬金直逼一姐胡杏兒和徐子珊。而香香加幅更驚人，年初騷價唔夠一萬，但自九月開始，竟彈跳五倍。雖然女神身價揦脷，但依然有價有市，近月二人幾乎日日見報。由九月至今，香香和苟姑娘攜手已賺近三百萬，難怪二人異口同聲說：「距離買樓目標愈嚟愈近！」
臨近聖誕，香香和苟姑娘經常孖住出席活動。據知，吸水孖寶一同亮相的話，原來每人額外會多2萬酬金，難怪苟姑娘同記者講唔介意俾香香搶風頭。
香香
升500﹪
騷價6萬（去年騷價1萬）
苟姑娘
升100﹪
騷價6萬（去年騷價3萬）
藝人身價向來保密，不過本刊近日接觸過幾個廣告客戶，獲得一份最新當紅花旦小生的內部騷價清單。知情人透露：「TVB通常年尾出定下年嘅騷價表俾班相熟客戶，不過今年九月尾已經出咗。見到有藝人嘅價升得好誇張。」據知，無綫今年忽然提早出騷價表，原因是眼見死對頭王維基的香港電視隨時獲發牌，在惡性競爭下，旗下藝員身價隨時被拖低，因此趁對手仍未攞牌前，盡地一煲賺番夠本。
香香價勁升五倍
據該份騷價表顯示，已離開無綫的佘詩曼持續高企，收15萬一個活動，冠絕無綫眾花旦。至於去年成為雙料視后的胡杏兒，亦由攞獎前的7萬騷價，跳升至10萬一個活動。而排第三則是視后大熱徐子珊，由去年4萬躍升至7萬，升幅驚人。但最估唔到只憑一個「高登女神」牌頭的岑麗香和苟芸慧，近日騷價竟瘋狂跳升至6萬蚊，比「Neway大少奶」陳法拉還要高5千。據知情者透露：「無綫近年策略係喺班華姐、港姐中揀幾個有潛質嘅出嚟拍劇，等佢哋有知名度可以叫高啲價。好似苟姑娘舊年拍完《情人眼裏高一D》後，騷價已經有3萬，比以往華姐高幾倍。至於香香就更加誇張，年初未有劇前，騷價唔夠1萬，點知八月尾《爸不得媽媽》出街，佢個價竟然升到6萬一場。」雖然升幅嚇人，但苟姑娘和香香公主出親騷都會自動波少布拋胸，因此仍有唔少客戶落疊。單以九月起計短短三個月，苟姑娘已出席36個活動，其間更接拍了電盈和妙蓮眼藥水廣告，至於香香更誇張，三個月內已出席40個活動，扣除了無綫抽佣，香香公主和苟姑娘分別穩袋近150萬。
識做冧高層
上周五（7日），苟姑娘出席完活動後，即向現場公關和客戶高層逐個揮手講bye bye，難怪長做長有。
賀歲孖寶
香香同苟姑娘接騷接到冇停手，更有份參與賀歲片《2012我愛HK喜上加囍》及《勁抽福祿壽》的演出，狂谷人氣。
現時岑麗香仍住在無綫安排給她的將軍澳中心寓所，近日頻頻出騷的她，揚言買樓目標是同區400萬的單位。
法拉黑面趕客
本來陳法拉有樣有身材，即使早年傳她已嫁人做薛家新抱，過往兩年依然是廣告商的寵兒，但後來每次工作她都要求多多，嚇走不少客戶。知情人透露：「好多人想搵佢同二少奶諸葛紫岐同場出騷，不過無論個客出幾多錢佢都唔肯，加上佢唔鍾意同𡃁模同場，客戶選擇又少咗。早排佢出席活動，試過黑面對啲記者，乜都話唔答。之後又鬧公關安排差，人哋仲點敢搵你。」由於麻煩兼腌尖腥悶，根據資料顯示，法拉由去年下半年接20個商場騷，大幅回落至今年只得5個。
而去年陳法拉分別接拍資生堂、reebok運動系列和OTO按摩椅廣告，但今年居然一個都冇。至於去年是華麗園食品代言人的她，今年亦被師妹朱晨麗取代。因此即使其騷價較去年僅微升5千，但乏人問津下，法拉今年收入較去年大跌。
苟姑娘：日日有嘢做
憑《爸不得媽媽》蘇基一角彈出的古明華，以往騷價表根本未入流，但最新價目表顯示，他一個騷收1萬5千元，都算係守得雲開囉！
上周六（8日），記者就騷價急升分別問過苟芸慧及岑麗香。苟芸慧淡定表示：「其實我仲未知實際賺咗幾多錢，但聽經理人講都唔錯呀。依家我日日起身都有嘢做。最近我趕緊拍《情逆三世緣》，多謝劇組俾我出去搵錢，亦多謝客戶肯俾機會我，搵我出騷，等我可以快啲買到樓。」
至於岑麗香則尷尬地說：「哈哈哈！有得做嘢就好開心，我唔計較搵幾多錢嘅。」講到買樓，她就漏口風表示：「我一直都想買樓，依家距離近咗好多，應該好快儲到筆首期。」
騷價升
升25﹪
騷價15萬（去年騷價12萬）
佘詩曼在中港兩地知名度高，自去年尾決定離巢北上發展後，其騷價竟然再創高峰。
升43﹪
騷價10萬（去年騷價7萬）
去年，胡杏兒連擸女角色獎及視后，名正言順加價。其騷價已由舊時的7萬元加到10萬元，而內地騷價亦收20萬人仔，直逼佘詩曼。
升75﹪
騷價7萬（去年騷價4萬）
徐子珊憑《雷霆掃毒》成為視后大熱門。若然順利取得視后，騷價有機同胡杏兒睇齊。
升10﹪
騷價5.5萬（去年騷價5萬）
陳法拉騷價較去年僅微升5千，而在過去三個月，她竟然只出席過5個商場騷，比起香香和苟姑娘，差得遠！
去年陳法拉做華麗園年糕代言人，其廣告在電視日播夜播，不過今年已由「A貨」朱晨麗（右圖）頂上。
騷價跌
跌10%
騷價4.5萬（去年騷價5萬）
年中，鍾嘉欣主演的《護花危情》成為全年收視之冠，可惜其人氣無以為繼，早前被踢出「女角色」候選名單，騷價微降。
跌1７%
騷價5萬（去年騷價6萬）
楊怡主演的台慶劇《名媛望族》正熱播中，本與徐子珊同是視后大熱，可惜早前她與羅仲謙傳出車震醜聞，加上欠缺客戶緣，騷價應聲下調至5萬。
小生騷價表
相對花旦的騷價，小生騷價較平穩向上。除黃宗澤衰雜食遭胡杏兒怒撇令身價暴跌外，其餘四大小生的騷價均向上發展。
第一位
騷價18萬（去年騷價10萬）
去年排第二位的鄭嘉穎憑《怒火街頭》成為3料視帝，即時起價。不過他拍內地劇已收超過千萬人民幣，一場18萬的活動，對他來說濕濕碎啦。
鄭嘉穎身價水漲船高真係要多得內地劇《步步驚心》，除了在港成為騷價最貴小生外，在內地接騷更收25萬人仔一個，真係賺錢賺到手軟。
第二位
騷價15萬（去年騷價12萬）
去年排第一位的林峯，今年人氣唔及鄭嘉穎，所以騷價屈居第二。現時他在內地趕拍劇集《紫釵奇緣》，睇啱價都未必會出席活動，以總收入計，同陳豪差不多。
第三位
騷價10萬（去年騷價8萬）
比起鄭嘉穎同林峯，陳豪騷價較相宜。但他密密執，單以今年拍了7個廣告計，每個收100萬，加上出席超過30個活動，扣除公司抽佣，陳豪今年賺超過500萬。若然他同陳茵媺以情侶檔上陣，更可以將騷價調高3成。
第四位
騷價4萬（去年騷價3萬）
眾多一線小生中，馬國明最抵用。今年他有兩套重頭劇《On Call 36小時》同《名媛望族》播出，成功吸引不少客戶邀出騷。
第五位
騷價3萬（去年騷價5萬）
年中，黃宗澤同胡杏兒分手，矛頭直指他花心，搞到形象插水，傾好的客戶亦紛紛縮沙，騷價急降至3萬。
