依家手機殼嘅作用，已經唔再淨係保護手機咁簡單，仲可以反映出手機主人嘅個性。好似女神苟芸慧用嘅日本娃娃殼勁可愛，大隻佬黃德斌用真皮機殼man爆，物似主人形。
苟芸慧一殼兩用
「呢個手機殼係我個加拿大朋友買俾我，個公仔好可愛，又可以當鏡用，我平日好鍾意照鏡，啱晒。」
價錢$230
物料硬膠
日本娃娃機殼走可愛路線，啱晒苟姑娘。女神呢排咁多job，得閒可以照鏡keep住靚樣，都好實用喎！
胡渭康自訂金屬殼
胡渭康為部iPhone 5專登網上訂機殼，此殼用飛機物料製造，好處係又輕又硬唔易爆，香港冇得賣㗎！
價錢$850
物料飛機金屬
「個殼真係好輕，我覺得好襯部機，令部機靚咗好多，我最鍾意佢粒『的』，好似手錶咁樣，好型。」
黃德斌皮套護身
黃德斌咁man，膠殼當然唔啱佢，啡色真皮機套就最合適，皮套襟撞襟磨，夠晒粗獷。
「女友送嘅，佢最知我心意。呢個真皮套好有保護作用，又好揸手，部機跌過幾次都冇事，證明個套夠保護，哈哈！」
價錢$650
物料真皮
