年底將近，樂壇成績表出籠，商台的《叱咤樂壇流行榜頒獎典禮》一向標榜公平公正，仲話「我最喜愛歌手」獎會由網民親自投選，不過實情講一套做一套。
據知今年環球高層黃劍濤（Duncan）繼續施壓其任職商台高層的老婆甘菁菁，點名要求旗下歌手陳奕迅攞金獎。操控《叱咤》賽果生死的甘菁菁，更於上月中開始，在商台每週指定playlist中刪除古巨基新歌〈初初〉，以防其播放率再次超越Eason。基仔無奈被禁播，連「我最喜愛男歌手」都被飛出5強，環球黨再次獨霸《叱咤》。
自稱四大頒獎禮中最有公信力的商台《叱咤樂壇流行榜頒獎典禮》，月初公布「我最喜愛男、女歌手」最後5強名單，點知今年成績甚佳的古巨基、盧凱彤離奇失蹤，吳雨霏和周國賢則爆冷入圍。
突然cut歌
無奈硬食
基仔慘被打壓6年，睇怕曾經都相信過商台係公平公正嘅佢，應該都開始心淡。
貴為Lam仔，Duncan點名要捧紅林德信，誓要踢走勁敵胡鴻鈞。中新社圖片
據商台員工透露，基仔今年雖然只出一碟，不過三首上台歌都好啱DJ心水。「之前〈戀無可戀〉同〈告別我的戀人們〉，班DJ都好鍾意，以播放率計，坐冠軍好合理，11月初基仔首〈初初〉開始派台，想再谷播放率，但係21號（11月）DJ收到playlist已經冇咗呢首歌，之前都話DJ可以播自己鍾意嘅歌，點知21號之後有人播咗基仔嘅歌就俾高層鬧。12月份嘅playlist再冇埋Ellen（盧凱彤）同胡鴻鈞嘅歌。」
據知商台一向的播歌機制，是由高層每星期更新一次playlist，DJ們大多會跟住playlist播歌，不過自9月開始，播歌自由大大縮減。
商台向來以播放率定獎項，故playlist突然刪除某歌手歌曲，不難令人聯想出電台刻意推高某歌手播放率博獎項。
新人胡鴻鈞和唱作人盧凱彤就係因為背景唔夠強勁，今年嘅努力要白費囉！
一家親
甘菁菁06年加入商台做高層後，即拍住環球高層老公黃劍濤一齊上，每年都為樂壇做「好事」。
出招保神
Eason雖然係公認唱得之人，但今年成績確麻麻，環球惟有出招搶獎，唔多夠說服力喎！
點名捧Kary
眾所周知，《叱咤》賽果的幕後黑手為商台助理總經理甘菁菁，亦即環球高級副總裁黃劍濤（Duncan）老婆，而Duncan幫旗下歌手爭獎絕對唔難理解。
據知今年除了犧牲古巨基外，胡鴻鈞、盧凱彤和樂隊Closer亦成為犧牲品。據唱片公司人員透露：「Eason初時派〈重口味〉反應一般，環球即刻搵校長（譚詠麟）同佢嚟個合唱版再plug過，咁至追番多少少播放率。Duncan今年點咗名要Eason、Kary同林德信攞獎，商台唯有㩒低有威脅嘅對手。好似Ellen（盧凱彤）今年成績都好㗎，可惜playlist一出，成隻新碟一首歌都唔畀播，咪造就咗Kary囉。胡鴻鈞都要輸畀林德信，冇辦法，輸background。」
古巨基自04年攞過「叱咤樂壇男歌手」金獎之後，一直都只有屈居銀獎，睇情況，雖然新碟情銷量佳，但商台機制話改就改，大碟獎都應該凍過水。
商台首先選出5強再畀網民揀最喜愛邊個，選擇仲少過TVB視帝視后囉！
電台有得打壓，好在YouTube冇得呃，基仔嘅〈戀無可戀〉點擊率有近百萬，而Eason嘅〈重口味〉，就算加埋佢同校長嘅版本都只得60萬，明啦！
棄將軒
張敬軒雖然仍與環球有約，但從來不受重用，資源又分配不足，故近日有指軒仔去意已決，明年約滿即轉會。
率先爆賽果
《叱咤樂壇流行榜頒獎典禮》仲有3星期至舉行，不過今年唔使等商台女員工爆料，本刊收到可靠消息，已經攞過8次男歌手金獎的Eason，再次揮低基仔繼續連任，容祖兒亦眾望所歸奪金；而今年只出一碟的商台寵兒方大同亦至少會得男歌手銅獎。今年楊千嬅因生仔收山、謝安琪剛轉會到星煥趕唔切爭獎，故銀獎和銅獎落在薛凱琪和Duncan點名的吳雨霏身上。新人獎方面，羅力威和林德信已是內定得獎歌手。不如改名叫《叱咤樂壇環球榜頒獎典禮》啦！
