橫店凍到得幾度，但勝在林峯夠熱情，尤其係對住身兼監製、女主角嘅葉璇，冧功盡出。上個禮拜三（十一月二十八日），劇組晨早出發到近郊嘅長征片場開工，當日主角有林峯、葉璇同苑瓊丹，大家都係香港人，但講到啱嘴型，苑仔無份，林峯、葉璇全程雞啄唔斷，當其他人透明。
葉璇連續幾套孭飛內地劇大收，搵到大水喉科水俾佢開劇做埋監製，就算連續幾年攞到亞太區最受歡迎男歌星，林峯亦識做碼實葉監製，就連整髮飾咁小事，林峯亦親自效勞，好細心。
冧女有一手，但出名叻冧歌迷嘅林峯，星期一（十二月三日）返到香港出席「我的最愛頒獎禮祝捷會」，記者會後大班歌迷為十二月八日生日嘅峯少提早慶祝，再花心思整咗個Birthday BOY襟針俾偶像掛住。
Chok住切完蛋糕趕住走嘅林峯，居然同歌迷講：「我想拆咗個襟針，好肉酸！」歌迷都係一番心意，何必再次傷盡少女心呢！
踏入十二月，無綫頒獎禮就快到，坐定笠六做視帝嘅林峯，依然日夜留守橫店，為內地劇《紫釵奇緣》開工。原本由工作人員幫葉璇插頭飾，林峯見到即刻請纓，難怪葉璇笑到咁冧。
同劇演員仲有苑仔苑瓊丹，但林峯只係專心服侍葉璇，就連夜晚收工食飯，苑仔只有助手陪食。見到歌迷整俾佢個Birthday BOY襟針，林峯居然唔俾面話肉酸，臨走仲即刻除低。
歌迷們同偶像提早慶生，林峯chok住許願吹蠟燭。
聽講林峯接拍《紫釵奇緣》，收四十萬人仔一集片酬，就算夜晚凍到震，呆等成晚只係拍一場戲，峯少都冇詐型。
