電視劇《犀利人妻》熱爆，到電影版《犀利人妻最終回：幸福男．不難》大收1.5億票房，講到尾，最大得益其實係女主角隋棠。
《犀利》電影版開畫前，突然爆出隋棠同姚元浩8年情玩完，疑似小三王心凌開記者會哭訴，信錯冇膊頭男人，隋棠唔執輸，崩潰表示愛情重傷：「心像被美工刀一筆一筆割。」戲外比戲內更精彩。
回復單身半年，隋棠延續犀利精神，由當初失戀爆瘦，到今日肥凸17磅上圍升cup，電影、廣告量多價更高，以行動證明自己「活得比你好」。
食到驚
套用電視版《犀利人妻》經典對白：「人妻有三怕，怕撞車、怕撞鬼、怕小三。」
雖然未為人妻，但隋棠睇住自己拍拖8年男友姚元浩偷食王心凌，一次不忠、百次不容，隋棠同《犀利》女主角「謝安真」心態一樣，已經「回不過去」。
失戀既成事實，老土都係咁話，唯有寄情工作。身高5呎7嘅隋棠，8月响台灣環島宣傳電影版《犀利人妻最終回：幸福男．不難》，體重一度跌到得番97磅，直到最近電影登陸香港，隋棠上個月親身飛嚟出席首映禮，已經肥到114磅。化悲憤為食量，但話晒名模出身，隋棠開始知驚戒消夜：「唯一好處是胸部大了一個cup，由B變C。」
心口升cup，隋棠事業同時升級，坐穩台灣女一號席位，多得電影版《犀利》票房大收1.5億台幣，隋棠開始集中火力強攻電影界，決定升呢大銀幕，今次《犀利》搬嚟香港上畫，隋一姐對票房充滿信心，仲話如果有好成績，會拉大隊組犀利旅行團，請台前幕後嚟香港購物慶功。
終於肥番嘅隋棠，上個禮拜珠光寶氣谷胸現身，事業得意卻愛情失意，當日隋棠開到聲想真命天子盡快出現。電視版嘅溫昇豪衰到冇人有，老婆入咗醫院，仲攞住張離婚書逼隋棠簽名；電影版佢終於知錯，做番個住家男人，希望同前妻重修舊好。
電影版故事係講4年後隋棠，由失婚師奶，變成事業媽咪，宥勝咁多年來一直默默守候人妻身邊，後來溫昇豪決定食回頭草，宥勝於是發力追隋棠，仲追到上埋床。
大豐收
多得《犀利》效應，隋棠身價水漲船高，聽講廣告最新價碼已經叫緊380萬台幣，單單今年，接咗12個廣告，進賬4,200萬台幣，相等於1,100萬港元。
女主角名成利就，片中飾演背妻偷食賤男「溫瑞凡」嘅溫昇豪，明明角色犯眾憎，偏偏招攬到唔少老中青女粉絲，上次香港宣傳，聽聞現場班觀眾，有8成人係專登嚟捧溫昇豪，搞到隋棠受冷落。
拍完《犀利》電影版後，溫昇豪陸續有電影、電視、舞台劇搵上門，但佢最遠大目標，原來係做歌星。
「我有參加歌唱比賽，可以唱現場的，最近開始跟唱片公司開會，希望一圓歌手夢。」咦！費玉清可能有對手喎！
至於劇中愛上失婚人妻嘅「藍總監」宥勝，星途同樣轉入大直路，新劇《我租了一個情人》收視報捷，今年高雄站嘅跨年晚會，仲有份上台處男獻唱，聽講佢都籌備緊出專輯，實行歌影視三棲賺到盡。
宥勝、隋棠感情原本轉入大直路，突然出現「新小三」大元橫刀爭宥勝，究竟會唔會大團圓？自己買飛入場啦！
