假孖女Twins喺樂壇撈足11年，今年終於有真Twins接力。2人女子組合AOA，最大賣點堅係雙胞胎，外貌一樣又確係有新鮮感。
24歲的AOA孖女來自廣州，來港後簽約金牌大風，又唱又跳，誓要打出名堂。所謂一人計短，孖妹有晒默契，比起其他女子組合自然少啲交嗌。AOA更直言：「我哋真係有心靈相通㗎！」
孖妹AOA相隔7分鐘出世，雙胞胎心意零舍互通，細孖Annice（吳燕菁）說：「我哋雖然隔幾分鐘出世，但性格都有唔同㗎。我（妹）個性開朗活潑，而且朝早會多嘢講啲；而家姐就靜少少，佢反而夜晚說話多啲，可能係朝早未瞓醒。我哋真係有心靈相通㗎！有時如果佢唔開心或者想搵人傾偈，我就會好自然咁打畀佢，真係好奇怪，可能呢啲係孖生嘅特別之處。」
唔會爭食
孖生做賣點，AOA亦並非得個樣，兩人從4歲開始學跳舞，精通芭蕾舞、現代舞及hip hop等。「其實我哋仲有好多嘢想學，好似上次喺TVB跳tap dance，我哋都未跳過，好新鮮，仲好好玩添。我哋希望可以好似小豬咁全能，跳舞又勁又受歡迎。」
2女外形九成似，好在佢哋對男生有唔同要求，否則爭食都幾大件事，家姐Annelle（吳燕珊）話：「我鍾意運動型嘅男仔，阿妹就鍾意啲文靜細心嘅，所以咁耐都未試過鍾意同一個男仔，如果真係鍾意同一個人，我哋會一齊放棄。其實識得我哋耐都會分到我哋，唔會撈亂嘅。」
Profile
大孖：吳燕珊Annelle（大Ann）
細孖：吳燕菁Annice（細Ann）
身高：168cm年齡：24歲
最愛演員：林青霞
喜愛外國組合：Westlife、BIGBANG、2NE1、S.H.E
跳得又唱得AOA激跳孖女風格
