男生愛打波打機，但現讀浸大國際學院（CIE）的吳天佑，卻天生貪靚兼零運動，獨愛化妝扮靚，更立志成為星級化妝師。
明明係男仔卻愛上化妝，吳天佑強調自己絕非同志，雖然家有警察嚴父反對他以化妝為終身職業，但天佑仍說：「我打算做兼職model
儲錢去日本讀化妝，我點都會堅持。」
外表斯文、在同學眼中視為男神的吳天佑（Antonio），現讀浸大國際學院（CIE）傳理學副學士，年半前第1次做兼職model開始化妝，自始便上晒癮，「當時化完個妝覺得自己好sharp好有精神！開始覺得男仔都好需要化妝！」自此Antonio開始鑽研化妝技巧，買外國化妝品牌Bobbi Brown出的化妝書參考、狂上YouTube偷師，年間Antonio自學成師，幾乎已成為女同學的化妝顧問，「我見到身邊女生化得唔靚，同皮膚兩截色，就會教她們轉用另一個度數化妝品！」
吳天佑（Antonio）
浸大國際學院傳理學副學士Yr.1
Antonio直言不喜歡做運動，一個月用近二千元添置化妝品及護膚品，講起化妝更加有心得：「男仔化妝最緊要均勻，要用base（底霜），加foundation（粉底）搽一次……」幾乎講到不停口。夢想成為星級化妝師的Antonio最希望能親手幫形象大膽的倖田來未化妝，同偶像有個近距離接觸。
並非同志
眼前的高大Antonio有六呎一，見他皮膚白皙，百五磅的他原來最討厭做運動，一講到運動就耍手擰頭，雖然談吐不太man，但亦沒有給記者camp camp的感覺。難得電視台新聞部又欠靚仔主播，吳天佑全力進攻電視台應該有運行，只是Antonio一直志不在此。「我讀傳理系純粹係阿爸要求，佢想我正常咁升學，我其實覺得好悶，如果香港的大學有化妝讀，我一定會報，我學咗兩年日語，希望畢業後去日本進修化妝，雖然當警察的爸爸不贊成我當化妝師，但我打算儲錢供自己讀書，我點都會堅持！雖然我鍾意化妝，但我唔係同志，如果有機會去到日本，梗係要識㗎妹啦！」
化完有自信
Antonio每日都會化淡妝返學，他直言「化咗妝個人變得有自信，唔化會唔自在！」自年半前開始接觸化妝，Antonio從此愛上稍施脂粉，屋企有一大堆專業化妝品，遮瑕膏、卸妝液、眼線筆、保濕面膜等應有盡有，比港女還姿整！
