阿Sa（蔡卓妍）同William（陳偉霆）拍拖2年都仲係咁sweet，William仲趁住今年生日，帶女友返屋企見家長。William事後喺活動自爆，話餐飯食得幾開心添！
William生日要開工，阿Sa惟有搵形象指導馬天佑食飯。不過睇嚟笑騎騎心情唔錯嘅阿Sa似乎心掛掛，梗係掛住男友啦！餐飯馬天佑埋單，當係幫阿Sa慶祝30歲生日囉。
上星期三（21日），威廉王子27歲正日生日都要開工拍戲，阿Sa咁啱唔使開工，就約埋形象指導馬天佑到中環食飯。夜晚8點，一行三人喺餐廳密密斟，未夠10點，阿Sa已緊張地示意要埋單，仲搵助手出門外視察有冇記者，之後助手截咗架的士泊正門口，阿Sa同馬天佑先上車，唔通趕住返歸陪William？
狂㩒電話
中途阿Sa見到FBI，仲好大方咁打招呼，不過就不時低頭send短訊。到22號阿Sa正日生日，馬天佑都有去生日P，仲用shooters砌咗個生日蛋糕畀阿Sa。嘩！好易醉㗎喎！
急急腳
未夠10點，阿Sa已經急急腳走人，坐的士返屋企。
阿Sa生日William俾女圍
22號阿Sa正日生日，William一樣要開工，出席活動時，自爆帶女友見家長兼食海鮮餐，官恩娜同Super Girls仲黐實William，幾咁受女性動物歡迎喎！
