韓國2PM兄弟組合2AM、4位1體時個個唱得跳得，其實分體發展一樣咁掂，最年輕的珍雲年頭參與偶像劇《星夢高飛2》演出；隊長趙權年中單飛推出大碟《I'm Da One》，到年尾終於輪到隊中最高大靚仔的瑟雍發威。
現年25歲的瑟雍，擁有6呎2吋超模身高，至吸引係操得一副鋼條身形，尤其8腹肌勁過A&F男模，最近終於單飛的瑟雍，孭飛演出韓片《26年》，唔使黐住2AM，一樣星夢高飛。
瑟雍參演的新戲《26年》，將於11月29日在韓國上畫。戲中，瑟雍為幫在一次恐怖擊襲中喪生的親人報仇，於是聯同一班同一遭遇的人組織暗殺隊，剷除恐怖分子主腦，瑟雍做警察主要目的係為咗可以收集情報。
6呎2吋高的瑟雍，唔只高大靚仔，身形仲fit到漏，剝衫擺S形甫士，露埋Chanel標誌真紋身，勁有睇頭。而瑟雍除樣靚唱歌好，現正於韓國慶熙大學修讀文化藝術經營科，好有上進心。
2AM成員中，雖然隊長趙權最早solo出碟；而最後生的珍雲又最早擔正拍電視劇，但講到隊中第一個拍戲成員，一定係25歲的瑟雍。2AM當中，以最唱得的隊長趙權最受歡迎，不過講外形，趙權一定唔夠瑟雍高大靚仔，今年9月尾2AM來港開騷期間，每逢瑟雍出場即引到班港女嗌到癲。
上月尾，瑟雍因做gym時，唔小心扭傷左腳，雖然傷到行唔到路，但亦照開工，最近就算左腳紥住紗布，一樣為男性雜誌《GEEK》影靚仔相，睇見都戥佢辛苦。
最叻萬歲
跛腳照做
早前，瑟雍主演的《26年》搞宣傳活動，腳傷未癒的他，坐住輪椅亦要上台亮相造勢，雖然有心，但就被主持人寸：「瑟雍係戲中年紀最細但係唯一一個坐喺度講話嘅人。」搞到瑟雍勁尷尬。
最近瑟雍更孖住韓國影后韓惠珍等實力派演員，合演將於11月尾在韓國上畫的新戲《26年》。戲中瑟雍飾演的一名警察，聯同一班國家射擊運動員及企業總裁等，計劃暗殺曾發動大屠殺的主腦，為死去的家人報仇。
身為電影界新丁的瑟雍，據知拍《26年》時好識擦鞋，對住導演同班前輩演員如韓惠珍等，說話例必恭恭敬敬，閒時亦會買點心到影廠侍候，唔怪得導演趙根賢都大讚瑟雍話頭醒尾，好有潛質做演員。
玩健身斷腳
6呎2吋高的瑟雍，除高大有型外，體形更keep到鬼咁fit，尤其8嚿腹肌最吸引。擁有一副靚身材，瑟雍每星期起碼去做3次gym，每次3粒鐘先可以操到線條咁靚，但上月尾瑟雍卻在玩健身時，於舉起健身器材期間，不慎扭傷左腳，令左腳掌及腳趾骨折，嚴重到要以輪椅代步。變跛腳型男雖然好慘，不過好彩冇傷及塊面，如果唔係以後點靠樣搵食。
有真有假
身形高大又靚仔的瑟雍，肯定大把女冧。入行4年，同瑟雍扯上關係的女星不少。前年先有玉女IU，但之後冇下文。真真正正斷正就有Wonder Girls成員昭熙，2人曾於去年聖誕節遊車河shopping，仲試過被人影到一齊撐枱腳食烏冬，雖然有相為證，但2人照例否認戀情。之後又出口術公開話想同少時嘅Sunny傳緋聞。唔知邊個先係真。
氹死玉女
前年，有傳瑟雍去美國工作時，狂買禮物送畀新晉玉女IU，繼而傳出瑟雍對IU特別照顧，不過傳傳吓就冇下文。
速食昭熙
瑟雍同WG成員昭熙撐枱腳食烏冬斷正，雖然有圖為證，但兩人的公司話雙方只係同公司嘅好朋友，並非戀人關係。
抽Sunny水
把口𠺘過油嘅瑟雍，亦曾出口術公開話自己同少時嘅Sunny關係密切，仲好希望可以同佢傳緋聞咁話，擺明抽水啦！
