■霆鋒早前喺北京間製作公司接受黎芷珊節目訪問，最近傳出佢想出售公司六成股份。資料圖片
謝霆鋒03年投資開嘅PO朝霆後期製作公司，由開始嘅11個員工到家香港、上海同北京三地都有分部，員工已經過百人，據講每年利潤高達8,000萬，所以公司計劃一年後上市。
傳黃柏高斟購不過最近馮仁昭聽到霆鋒間公司有意作價8,000萬大幅出讓六成股份，其中一間曾接觸嘅公司係黃柏高（Paco）話事嘅太陽娛樂文化，但聽講因價錢略嫌太高，最後冇傾成。霆鋒間公司，香港總部八成業務做廣告製作，兩成做電影。但今年6月喺北京開嘅分公司就九成主力會做電影，佢公司睇落去應該前景一片光明，但突然想賣六成股份出去，將公司話事權交畀人，的確令人覺得奇怪。
唔知今次決定同早排發生咗《低俗喜劇》單嘢有冇關係？事緣《低》片後期畀完佢間公司做，網上就出現高清版免費任人睇，仲要流出嘅版本開頭出現"Sample For PO Opening REF"字樣，投資《低》片嘅太陽娛樂文化話要追究責任。噚日問番黃柏高，佢回應：「公司同霆鋒冇傾過買PO朝霆嘅事，只係傾合作拍戲。」至於求證霆鋒經理人霍汶希，佢就話要先同霆鋒了解吓。
