娛圈藝人拍拖，為咗形象，好多都愛得閃縮，反而社交名人就勇字當頭。好似同樓神男友林達民（Thomas）拍拖3個幾月嘅鄺美雲（Cally），不但與對方打得火熱，周一（19日）仲出面撐男友公司嘅新樓盤活動㖭！
鄺美雲當日心情靚爆，不時大讚男友公司推出嘅新樓盤好靚。提到Thomas曾揚言要努力工作迎娶佢，Cally冧笑話︰「我冇聽過，你問佢啦！佢同你哋老友嘛，冇同我講呀！」甜成咁，媽咪姐都戥佢開心！
鄺美雲同林達民合照嗰陣好鬼怕醜，隔開成幾吋遠！鄺美雲行頭十足，手上巨型珍珠鑽戒、手鐲，閃到暈！
鄺美雲見慣世面，但同男友影合照，就有啲怕醜，搞到Thomas望穿秋水等咗佢幾分鐘。
搞開美容生意嘅張兆輝夫婦，最近去咗會展擺美容展銷。輝哥仲親力親為sell客㖭！媽咪姐同輝哥傾傾下，三嫂戚美珍都嚟埋探班，有輝哥、輝嫂同三嫂做生招牌，生意想唔好都難啦。
