■娟妹墓碑上刻有天使，好似守護神咁陪住佢。
今年六月病逝嘅羅慧娟，佢嘅骨灰會安放喺香港華人基督教聯會薄扶林道墳場，噚日娟妹嘅親友去嗰度出席儀式，朝早近11點，娟妹丈夫劉志敏同牧師、三位哥哥同姐姐羅慧蓮，以及好友陳法蓉、賈思樂陸續到場。儀式約一小時，眾人喺牧師帶領下祈禱，其間見劉志敏同羅慧蓮落淚。
夫誦讀聖經娟妹嘅家人選用白色雲石做墓碑，墓碑寫住「愛妻劉羅慧娟之墓」，仲有張娟妹天使造型嘅彩色相，側邊有幾個心形同天使圖案，好似守護神咁陪住娟妹。儀式後劉志敏同牧師離開，見劉志敏喊到鼻紅紅，但佢肯受訪，講到近來嘅心情，佢話：「OK，因為係基督徒嘅關係，所以揀呢度，我哋搵咗好耐，之後可以多啲時間嚟探娟妹。」至於今次儀式嘅安排，佢話：「冇乜嘢安排，我有讀聖經畀佢聽。」同娟妹感情好好嘅羅慧蓮，佢走嗰陣喊住話：「我好唔捨得佢。」陳法蓉淨係話：「辛苦晒，你哋小心啲，多謝關心。」
