由黃宗澤同Stephy孭飛嘅新戲《等．我愛你》，上個禮拜三晚（十一月七日）舉行首映禮，咁啱前一晚（六日）係胡杏兒生日，黃宗澤自爆有send祝福短訊俾舊愛，問到壽星女有咩回應？黃宗澤答得好尷尬：「我自己生日都收好多短訊，但唔會個個都回覆。」即係冇回音啦！
甩拖三個幾月，黃宗澤呻冇女人敢埋佢身，甚至自己套戲首映，亦冇請女性朋友嚟睇，尤其係「姣神」徐子珊，怕再連累無辜喎！
講到要戒色咁嚴重，黃宗澤當晚只係請咗阿媽、契媽，仲有無綫嘅樂大媽嚟睇戲，俾人笑係裙腳仔好過再惹新緋聞；至於佢位舊愛胡杏兒，生日要出發去英國法國拍《衝上雲霄II》，壽星女笑晒逢人攬，仲話觀眾已經聽到厭，以後都唔會再講黃宗澤呢個人喎！
黃宗澤呻冇女埋身，短期內唔會諗拍拖，所以首映只係請咗阿媽同契媽嚟睇戲，當然唔少得錫到佢燶嘅樂大媽樂易玲。
胡杏兒正日生日出發英國拍《衝II》，張智霖向壽星女送上愛的抱抱。
