前排I.T半價益名人明星，大胸模Phoebe（許穎）就被影到同個戴帽嘅男仔响銅鑼灣I.T狂掃貨，不過掃完貨後兩個人就刻意避忌，原來真係有古怪。
FBI八到，戴帽男名叫Rex Tsui（徐遠亮），係一位攝影師，幫過唔少明星及雜誌影靚相同廣告相，上年Phoebe因為同佢合作，幫一個網站影咗輯性感相而撻着，計計吓已經行埋咗成年，而Phoebe最近亦喺Instagram晒情侶鞋，仲標籤咗Rex Tsui話：「Love u so much」，似乎好想人知咁。FBI打畀Phoebe經理人Kathy了解啦，點知佢好大反應咁話Phoebe同Rex唔係拍拖，仲反問FBI做乜問呢個問題，跟住就以忙碌為由匆忙收線。其實好多紅星都公開拍拖啦，點解反而咁奀嘅Phoebe拍拖，經理人公司要咁大反應？FBI笑咗！
Phoebe曾涉嫌虛報年齡，兼整爛身份證。書展寫真過後，形象負面嘅Phoebe暫時冇乜嘢撈，主力都係捽吓碟做DJ。Phoebe同Rex發現有記者影相，即刻行到離行離列，使唔使咁避忌呢？
