Dry咗一年的衞蘭早前自爆有教友追求，咪以為佢參考容祖兒當年「幻想」有個日本男友，衞蘭新歡堅金堅，叫Sander Jackson，在美國做設計工作，為追求Janice留港人釘人，據知兩人由朋友變拖友，只得兩個月貨仔。為怕再被老闆黎明送入雪櫃，二人約會，叫埋衞詩一齊做電燈膽，企圖射歪。
虔誠教徒
衞蘭的新歡全名叫Sander Jackson Siswojo，同樣是混血兒。據了解，Sander Jackson是虔誠基督徒，積極參與教會工作，即使去美國讀書，都刻意揀一間有基督教背景的大學，攻讀美術的他，曾經在《IDN》雜誌做過設計，也在《Point》做過設計總監，去年在紐約開過個人設計展。
雖然基地在紐約，但Sander Jackson不時抽空回港探親，與衞蘭於教會相識。
「Jackson同佢兩姊妹（衞蘭衞詩）都係鬼聲鬼氣，好快就好老友，同Janice特別啱傾，佢兩個連聽歌啲品味都好似。」一名教友透露。
Janice同Sander Jackson的戀情剛開始，兩人約會未有太親暱的行為。落到時裝店，放低警覺性的Janice，輕摸男友的臉龐。
Janice手多多搞百貨公司櫥窗擺設，被保安喝止，Sander Jackson二話不說幫手善後。為免再被黎明急凍，Janice找來胞妹Jill為兩人做擋箭牌。
醉翁之意
去年底，衞蘭同外籍男友Roger分手後，一班教友定時定候安排節目開解安慰，身在美國的Sander Jackson亦不時抽空返港，出席活動，起初大家都不以為意，直至幾個月後，Sander Jackson留港時間愈來愈長，大家才洞悉佢醉翁之意不在酒。
「以前幾個月甚至半年先見到Jackson，Janice甩拖之後就差唔多每個月都見到佢，大家feel到佢對Janice有意思，咪幫手撥吓囉！」一名教友透露。
沿途行去開餐，Janice不時向男友展示自己電話內的照片。
今年七月開演唱會，Sander Jackson專程返港撐場。在美國從事設計工作的Sander Jackson，去年發表用紙板為材料的椅子。
水到渠成，近兩個月，二人已經由朋友變拖友。但有過同前度高調拍拖被老闆黎明送入雪櫃的教訓，Janice決定拍拖三人行，經常搵埋胞妹衞詩做擋箭牌。
早前記者發現Janice同男友中環拍拖，二人雖然冇高調拖手，但她仍忍不住摸吓對方塊面，行為親密。二人走入時裝店睇衫，同行的衞詩逗留五分鐘先行離開，Janice和男友逗留超過半小時，行去Harvey Nichols頂樓撐枱腳，其間Janice不小心整跌百貨公司內的櫥窗擺設，Sander Jackson立即幫手收拾，表現細心。
比起衞蘭以前的口味，Sander Jackson明顯賣藝唔賣樣。
一年情
混血衞蘭性格鬼妹，入行七年，緋聞男女均有，但全部一年貨仔玩完。
當年同Roger高調拍拖，被黎明送入雪櫃，戀情最終只維持一年多。出道不久，衞蘭被拍拖一年的舊男友Gordon公開濕吻照。
自從胞妹衞詩在日本藏毒被捕後，兩姊妹齊齊信主洗底。10年，衞蘭在教會結識了外籍男友Roger，對方更高調現身Janice的演唱會打氣，但二人戀情唔夠一年又玩完。
06年，衞蘭被指包養TB助手阿端，二人經常當街拖手，態度親暱，Janice廿四歲生日當晚，阿端更被拍得在Janice寓所過夜，最終由老闆黎明下炒魷令。
