一連十二場《草蜢森巴大戰軟硬fans演唱會》，上個禮拜三（十月二十四日）正式開騷。兩隊九十年代經典組合同台，唔只唱歌跳舞棟篤笑咁簡單，草蜢同軟硬每場演唱會都分做五個回合比賽，最尾部分內容更加晚晚唔同。
首場開騷，蔡一傑無厘神氣，第三場有Eason神手加持，即時起動有反應！身材唔在狀態，傑仔靠服裝出位，呢個下體犀牛衫，襯晒佢！
暫時最精彩係上個禮拜六晚（二十七日），五個著住紅衫紅褲上台，各自邀請fans一齊合照，之後現場熄晒燈，原來佢哋全部剝衫除剩條紅褲仔，明抄早前叫咗班冇上裝大隻佬做服裝店開幕條橋。個個晒腹肌，當中阿葛最搶鏡，為咗演唱會努力減磅，由一百八十五磅肥天師，搣脂後得番一百四十六磅，都谷到少少腹肌。
幾乎係演唱會都去睇嘅Eason，當晚都係座上客，完騷後即入後台同五男合照，仲手多多摸蔡一傑個腩。由第一場唔記得歌詞，到之後愈唱愈投入嘅傑仔，俾Eason嘅神手一摸，褲襠位置即時生猛晒，之後笑佢哋五個似救生員，又話都想好似佢哋咁好身材……喂喂喂，閣下係咪又想上台玩番晚呢，係又唔客氣啦！
Eason
做完長達二十分鐘opening，輪到林海峰嘅棟篤笑時間，即場示範醜化草蜢嘅舞姿，老婆彭羚睇得好投入。
五個無上裝襯紅褲仔同fans合照，傑仔一向貪靚，但今次開騷居然疏於操肌，連減肥成功嘅阿葛都fit過佢。
話明最尾一部分晚晚節目內容都唔同，首場係鬥老鼠仔邊個最大，最後阿葛勝出獲頒軟硬錦旗，佢瞓地冚白旗扮死，蘇老闆傑仔向佢敬禮，大吉利是。
草蜢軟硬每晚都會分五個回合比賽，以現場觀眾掌聲俾分，四位比堅尼女郎同軟硬跳完舞之後變身分牌女郎，露半球露半股，好睇過蘇老闆嘅六嚿腹肌。
