上個禮拜三晚（十月二十四日），台慶搞笑節目《萬千升呢福祿壽》進行錄影，嘉賓包括兩位高登女神苟芸慧同岑麗香，仲有陳法拉、李亞男同徐子珊，全部鬥靚出身。
女人嘅眼淚，幾時都係最強嘅武器，兩位高登女神一齊喊，真係唔知安慰邊個先好！
近期全城熱烈討論香香同苟姑娘究竟仲係咪處女，兩個都係基督教，香香以主先會知嘅秘密回應，苟姑娘就堅持明示暗示自己仲係玉潔冰清。
由信仰到守十誡，兩位女神都咁啱key，就連上節目都一齊攬住喊！
當晚福祿壽安排兩位女神上「主場大辯論」，苟姑娘講番早排俾傳媒話佢同謝天華車震，即刻委屈落淚，唔關事嘅香香竟然忍唔住，攬住喊埋一份！
明明係搞笑節目，香香苟姑娘無端端喊晒，搞到扮緊白姐姐嘅阮兆祥，要即時出手安慰。淚腺發達若用諸演技，前景應當樂觀！
有份做嘉賓嘅陳法拉埋位影相前照牙兼照鏡！
開始辯論前，大會叫苟姑娘咬手指做個誘惑動作，扮葉劉嘅王祖藍跟住做，好嘔。
