與黃貫中拍拖15年，一直聲稱反對婚前性行為的朱茵最終打爛齋缽兼有餡，不過大肚半年來一直匿埋屋企避世，除了間中在微博留言外，幾乎與外界隔絕。有指朱茵產前鬱躁，經常搵阿Paul做出氣袋。
周二（23日）阿Paul終在微博宣布「小龍女」出世了，更上載得意B女照片說：「各位，好靚新鮮出爐叉燒包！」重6.6磅的龍女首度曝光，產後的朱茵依然肥腫故此唔想見人。
據知B女比預產期早了一個月出世，而阿Paul與朱茵早在女兒出世前已秘密註冊結婚，好讓朱茵名正言順成為黃太。唔好再話佢未婚生女喇！
躁底王黃貫中98年與女神朱茵拍拖，至今年4月承認女友懷孕，周二（23日）阿Paul在微博宣布小龍女出世了，可喜可賀。
不過朱茵佗B期間原來並不好受，皆因她佗B四個月時已開始暴肥，為了不影響胎兒吸收營養，她亦不顧身形照食。阿Paul曾爆女友非常大食，一日食足九餐。知情人士透露：「初期B女啲營養俾阿媽吸收晒，阿茵拍心口話最多唔出街，每日飲孕婦奶粉，肥腫都冇所謂，最緊要B女健康。佢前後都肥咗四十幾磅，最尾兩個月個肚大得好快，加上朱茵40歲係高齡產婦，所以醫生建議早一個月開刀。呢九個月嚟佢每次去產檢都好小心，唔想俾記者影到相，平時一定唔會出街，因為唔想摧毀性感女神嘅形象。」
4月報喜:今年2月有報道指朱茵有喜，但她極力否認。至4月17日，朱茵在微博上載與阿Paul相擁的半裸照宣布有喜，同日晚上兩人十指緊扣從大馬回港，並在半百傳媒前承認懷孕三個月。有人批評身為基督徒的朱茵大話連篇，因她曾多次強調反對婚前性行為。
10月叉燒包出爐
周二（23日）晚上，阿Paul在微博公告女兒已出世，更稱呼B女為「新鮮出爐的叉燒包」。相中B女雖然早產一個月，但表情多多口擘擘，非常可愛。
8月入紙註冊
阿Paul與朱茵今年8月24日入紙婚姻註冊處申請結婚。根據法例規定，入紙後三個月內須完成註冊儀式。阿Paul與朱茵亦趕及於女兒出世前秘密簽紙。
半年從未露面
朱茵的預產期本來是在11月25日，阿Paul一早為她訂了位於九龍城的聖德肋撒醫院（即九龍法國醫院）私家病房，多個月來她一直在九龍城娘家養胎。
母愛偉大，但匿埋屋企半年唔出街，加上孕婦因賀爾蒙的變化影響情緒，令朱茵經常無理取鬧。「阿茵佗B時好躁，成日鬧人，阿Paul都喺微博講朱茵成日鬧佢。不過阿Paul冇駁嘴，知道女友為咗BB唔出街，佢亦甘心做出氣袋。」知情者說。
大肚婆鬱躁實錄
朱茵匿在九龍城娘家半年待產，冇得出街加上孕婦情緒有變，出現產前鬱躁。其煩躁心情更可在微博字裏行間表露無遺。
日前阿Paul終在微博自爆經常被無理取鬧的朱茵狂罵，但為了B女，他心甘情願忍受。早前阿Paul在微博公開了一個心理測驗，問失戀的人拿到一杯畫了心形花的咖啡時會怎樣。朱茵揀的答案是「直接反枱」，可見大肚朱茵非常躁底。
家有兩頭狗
朱茵是愛狗之人，不過佗仔期間不時當阿Paul係狗咁差遣，更在微博上講笑話阿Paul都係金毛尋回犬。難得阿Paul就晒佢，唔嬲喎！
陪朱茵安胎
開刀前請律師註冊
雖然阿Paul對朱茵百般呵護，任勞任怨，但身為基督徒的朱茵違反教規，公然婚前性行為後懷孕，始終難過自己心理關口。為此阿Paul亦盡量補救，於今年8月24日入紙申請註冊結婚，希望在BB出世前簽紙註冊，給朱茵一個名份。據知阿Paul與朱茵上月知道要提前開刀後，即安排律師低調為他們舉行簽紙儀式，讓朱茵放心入院開刀生女。剛產女的朱茵現已回家坐月休養，要餵奶湊女之餘，亦忙於補身及修身，待坐月後便開始籌備下年的婚禮。
連日來都有傳媒在朱茵的娘家九龍城寓所守候，可惜全無收穫。朱茵已成為娛樂圈史上首位宣布大肚後至ＢＢ出世都未見影的媽咪，認真神秘。自從阿Paul宣布朱茵有咗，每次阿Paul工作後都返九龍城寓所，全力照顧大肚中的朱茵，果然係廿四孝老公兼爸爸。
撲水搵奶粉錢
現時朱茵要全職湊女，搵錢責任當然由阿Paul負責。最近開拍的電影《少年古惑仔》，由江湖味道甚重的阿Paul飾演陳浩南的大佬「B哥」。周日（21日）首天為《古》開工的他，身形明顯比之前消瘦，不過榮升了爸爸的他心情特別靚，與單立文雞啄唔斷，分享初為人父的喜悅。據知朱茵上周已誕下B女，阿Paul亦提前向劇組請假兩天陪產，因他承諾會親手幫BB剪臍帶。BB出世後，一家三口回家安頓一切，周三（24日）阿Paul才返劇組繼續拍攝。
阿Paul復工首日於銅鑼灣渣甸街天台拍攝，現場所見他未見疲態，還非常雀躍，不時有工作人員上前恭喜他。埋位前，阿Paul更與劇中演員雷宇揚邊扯煙邊吹水。雷宇揚離開時見記者時說：「我有恭喜阿Paul呀！佢仲俾咗佢親自操刀嘅囡囡相我睇，好得意呀！」
首度親口報喜
當晚六時許，阿Paul離開拍攝現場時，由幾名大漢陪同下，準備去下一個場地，見到在樓下守候的記者，他態度友善邊行邊回答提問，「B女開刀生，重6磅10（即6.6磅），未改名呀！我已經學識餵奶同換片。（係咪出世前同朱茵已秘密註冊？）係呀！一早註咗冊，咩都搞掂晒。（朱茵聽日生日點慶祝？）我冇假放要搵奶粉錢，都未諗點同佢慶祝。（係咪好想收工返屋企？）真係好想返去見個女。」提起女兒，阿Paul笑得好冧，看來除了老婆大人朱茵，他多了個小情人。
好友祝福
阿Paul宣布女兒出世後，不少圈中好友都在微博表示恭喜。而阿Paul在電影中的拍檔，亦在電話中向大佬個B女送上祝福。
直認老婆鬱躁
問到朱茵產前鬱躁，阿Paul直認，「係啦！佢壓力好大，黐線㗎！不過我都頂得順！可能孕婦易躁啦！（會唔會搞百日宴？）諗緊，不過驚麻煩到人，未決定。」
女兒剛出世幾天，阿Paul表現淡定心情輕鬆，全因他早已為家中兩位至愛安排一切。據知阿Paul知道朱茵有孕時，已四處物色陪月員，待朱茵產後有人全天候照顧，煮補品進補，亦可教導初為人母的朱茵幫BB洗澡、換片等。早前阿Paul曾說過，已將屋內其中一間房改為BB房，所需物品亦早已買齊。除了現時開拍中的《新古惑仔》之外，下月尾阿Paul會與方大同、盧凱彤合作為商台的拉闊音樂會演出。密密搵錢的他，更向傳媒自爆擁有三部車，當中的七人車會預備給BB用，希望佢坐得舒服。
周三（24日），阿Paul開工拍《新古惑仔》，因為不能在家扯煙，所以在現場煙駁煙。心情靚爆的他還在空檔彈結他，面對在場記者，新任爹哋亦友善回應，一改躁底作風。
修身接廣告
在朱茵宣布有孕時，已有BB產品的廣告商搵朱茵做代言。據知到現時為止廣告酬金合共高達八百萬，當中大部分是BB產品。而朱茵亦心郁郁，因為有錢袋之餘仲有贊助，可免費任用產品。而一向不求物質的阿Paul亦相當贊成朱茵接廣告，希望BB有優質生活，不過一切都要等貪靚的朱茵修身後才能進行。
朱茵曾經同朋友講過，她的夢幻婚禮希望在陽光海灘下舉行，不過有了小朋友，這些浪漫主義的婚禮應該好難實現。
在《新古惑仔》中，阿Paul飾演大佬「B哥」。
雖然女兒已出世，但阿Paul要搵奶粉錢都要開工。連日見他消瘦了不少，又要拍戲又要幫手湊女，應該都幾辛苦。
狗狗情緣
朱茵與阿Paul早年住在同一大廈樓上樓下，98年阿Paul的愛犬金毛尋回犬走失，被朱茵收留了。阿Paul貼街招登尋犬啟事，朱茵才發現狗主是阿Paul。之後兩人不時約會，99年公開承認拍拖。拍拖15年間，阿Paul為維護女友，經常鬧人爆粗。
兩人03年秘遊蘇梅，五日行程大部分時間都留在酒店房，更被本刊影到朱茵殘爆三點式相。
怒告周刊00年，有傳媒報道朱茵為富商男友懷孕和墮胎，跟黃貫中鬧情變。阿Paul在拜黃家駒時，聲言會不惜傾家蕩產告某周刊，誓要替女友取回公道。
鬧爆警察08年，阿Paul帶朱茵出席倒數活動，遭警員阻撓不准落車，他即扯火：「頭先班差佬唔俾落車……係官僚作風。我都有份出糧俾佢哋，捉賊槍戰又唔見咁生猛，欺壓良好市民就咁man。」
為女出頭10年，朱茵被狗仔隊偷拍，Paul凌晨開blog狂鬧：「唔出聲不代表我怕你們……近十多年來我已經忍夠，今天四十幾歲的我還有甚麼要怕？我所愛的人受到傷害的時候，我絕不會坐視不理！」
恐嚇記者今年，因有報章報道阿Paul的個唱入座率只有得七成，他在微博開名用粗口鬧某報編輯及記者惡意中傷，並發放狂躁兼涉嫌恐嚇言論「你好x大鑊」等。當時已懷孕六個多月的朱茵亦在微博力撐阿Paul。
狂鬧狗仔隊的阿Paul，揸住碌棍影相，惡形惡相。
