楊怡真係幾黑仔，最近拍《仁心解碼2》扭傷腳，「男友」羅仲謙又被指同北京舊愛未斬纜，搞到佢傷身又傷心。
周日（21日），佢為台慶劇《名媛望族》宣傳，傳媒當然唔放過機會問佢謙謙嘅緋聞。唔使講，楊怡梗係話對「好朋友」投下信心一票，仲話呢單緋聞係舊聞一則，唔需要提。其間，佢為咗轉移視線，仲特登拉高裙腳俾大家影佢嘅腳傷。可惜吖，楊怡做咁多嘢，大家嘅焦點依然都落喺佢同謙謙身上，佢嘅腳傷真係幫唔到咩手。
21/10包黑紗布:周日（21日）楊怡受訪時，主動揭開裙腳，露出包住黑紗布嘅腳，可惜都係冇人理佢。
助手扶走:做完活動後，助手托住楊怡胳肋底離開，當時楊一拐一拐，睇嚟好辛苦。
15/10傷足一周:上周一（15日），楊怡出席《名媛望族》首次宣傳時，已着住波鞋襯晚裝現身，不過冇人發現佢有腳傷。
